పెళ్ళి ముహూర్తం వచ్చేసింది. వరుడు తాళి చేతికి తీసుకున్నాడు. అంతే అప్పటివరకు నవ్వుతూ పెళ్ళి పీటలపై ఉన్న వధువుకు కోపమొచ్చింది. తాళిని అతడి చేతుల్లో నుంచి తీసుకుని పక్కన పడేసింది. ఇంతలో ప్రియుడు పోలీసులతో అక్కడకు వచ్చాడు. ఇంకేముంది.. పరుగెత్తుకుంటూ వెళ్లిన వధువు ప్రియుడికి ముద్దులు ఇచ్చింది. దీంతో పెళ్ళి ఆగిపోయింది. పంచాయతీ పోలీస్టేషన్‌కు వెళ్ళింది.
కడపకు చెందిన భావన చెన్నైలో సాఫ్ట్వేర్ ఉద్యోగిగా పనిచేస్తోంది. ఆమెతో పాటు పనిచేసే ఆకాష్‌తో ప్రేమాయణం నడుపుతోంది. అయితే ఈ విషయం తెలిసిన భావన తల్లిదండ్రులు వేరొక వ్యక్తితో వివాహం నిశ్చయించారు. పెళ్ళికి కూర్చుంది భావన. నిన్న సాయంత్రం వివాహం జరగాల్సి ఉంది.
చిత్తూరు జిల్లా గుర్రంకొండలో వివాహం జరగాల్సి ఉంది. అయితే పెళ్ళి జరిగే సమయానికి వధువు లేచి నిల్చుంది. తనకు ఈ పెళ్ళి ఇష్టం లేదంటూ తాళిని వరుడు చేతుల్లో నుంచి తీసుకుని పక్కన పడేసింది. ఇంతలో పోలీసు జీపు సైరన్ కొడుతూ వచ్చి మండపం ముందు ఆగింది. అందులో నుంచి ఆకాష్ దిగాడు. అతడిని చూడగానే భావన పరుగెత్తుకుంటూ వెళ్ళి ముద్దులు ఇచ్చింది.
దీంతో పెళ్ళికి వచ్చిన వారందరూ అవాక్కయ్యారు. వరుడు బంధువులు పెళ్ళి మండపం నుంచి వెళ్లిపోయారు. పెళ్ళి కాస్త ఆగిపోయింది. ఇంకేముంది గుర్రంకొండ పోలీస్టేషన్‌కు వధువు, ప్రియుడు వెళ్ళారు. తాను మేజర్‌ను అనీ, తనకు ఇష్టం లేని పెళ్ళి చేస్తున్నారని భావన కూడా పోలీసులకు రాతపూర్వకంగా ఫిర్యాదు చేసింది.
