ఏపీలో తెలంగాణ సీఎం రేవంత్ రెడ్డి సభ జరుగనుంది. విశాఖ స్టీల్ ప్లాంట్ ప్రాంతంలోని కృష్ణా మైదానంలో తెలంగాణ ముఖ్యమంత్రి రేవంత్ రెడ్డి ప్రసంగించనునున్నారు. పీసీసీ మాజీ అధ్యక్షుడు గిడుగు రుద్రరాజు నేతృత్వంలో ఏపీ కాంగ్రెస్ సీనియర్ నేతలు మైదానాన్ని పరిశీలించారు.
ఈ సమావేశానికి 70 వేల మంది హాజరవుతారని ఆశిస్తున్నామని, ఈ ప్రాంతానికి కీలకమైన వీఎస్పీ ప్రైవేటీకరణను వ్యతిరేకించడమే దీని ప్రధాన ఉద్దేశమని చెప్పారు. అసెంబ్లీ, లోక్ సభ ఎన్నికల నేపథ్యంలో ఆంధ్రప్రదేశ్‌లో పార్టీ నైతిక స్థైర్యాన్ని ఈ సమావేశం పెంచుతుందని కాంగ్రెస్ భావిస్తోంది. గత పదేళ్లుగా ఆంధ్రప్రదేశ్‌లో కాంగ్రెస్ పార్టీ విజయం సాధించలేదు.
తెలంగాణలో పాతుకుపోయిన బీఆర్ఎస్‌ను ఓడించి ముఖ్యమంత్రి అయిన రేవంత్ రెడ్డిని రంగంలోకి దింపడం ద్వారా వచ్చే ఎన్నికల్లో చక్రం తిప్పి ఖాతా తెరవాలని కాంగ్రెస్ లక్ష్యంగా పెట్టుకుంది. ఏపీసీసీ చీఫ్ వైఎస్ షర్మిల ఉక్కు ఉద్యమానికి చురుగ్గా మద్దతు పలుకుతున్నారు.
రేవంత్ పర్యటనతో పాటు ఆమె మద్దతు ఆంధ్రప్రదేశ్‌లో కాంగ్రెస్‌కు పునరుజ్జీవం చేకూరుస్తుందని భావిస్తున్నారు. ఈ క్రమంలో ఏపీలో తెలంగాణ సీఎం హోదాలో రేవంత్ రెడ్డి తొలిసారిగా బహిరంగ సభలో పాల్గొననున్నారు. ఈ సభకోసం భారీ ప్లెక్సీలు, బ్యానర్లు ప్రత్యేక ఆకర్షణగా మారాయి.
