రాష్ట్రంలో పశ్చిమ-నైరుతి దిశలో గాలులు వీస్తున్నాయని అమరావతి వాతావరణ కేంద్రం తెలిపింది. వీటి ప్రభావంతో రాగల 24 గంటల్లో రాష్ట్రవ్యాప్తంగా అక్కడక్కడా తేలికపాటి జల్లులు కురుస్తాయని వాతావరణ కేంద్రం తెలిపింది.
కొన్నిచోట్ల ఉరుములు, మెరుపులతో వర్షాలు కురిసే అవకాశం ఉందని వెల్లడించింది. ప్రత్యేకించి ఉత్తర, దక్షిణ కోస్తాలో చాలా చోట్ల తేలికపాటి నుంచి మోస్తరు వర్షాలు కురుస్తాయని స్పష్టం చేసింది.
రాయలసీమలోనూ తేలికపాటి నుంచి మోస్తరు వర్షాలు కురుస్తాయని తెలిపింది. మిగతా చోట్ల వాతావరణం పొడిగా ఉంటుందని స్పష్టం చేసింది.
విజయవాడలో బుధవారం రాత్రి 11.30 గంటల నుంచి 12.30 గంటల వరకు ఏకధాటిగా కురిసిన వర్షంతో రహదారులు జలమయమయ్యాయి. ఈదురుగాలులతో బందరు రోడ్డులో భారీ వృక్షం నేలకొరిగింది.
ప్రకాశం జిల్లా కారంచేడు, చీరాల ప్రాంతాలో 10 సెంటిమీటర్లు, రాజధాని ప్రాంతంలో తాడికొండ, రాయపూడి, తుళ్లూరు, గుంటూరు జిల్లా గురజాల, దాచేపల్లి, పిడుగురాళ్ల తదితర ప్రంతాల్లో 8 సెంటిమీటర్ల వరకు వర్షపాతం నమోదైంది.
