ఆంధ్రప్రదేశ్‌లో ఎన్నికల ప్రచారం చివరి దశకు చేరుకుంది. గెలుపే లక్ష్యంగా అన్ని పార్టీలు ప్రచారాన్ని ముమ్మరం చేశాయి. ఈరోజు సాయంత్రం 6 గంటలకు ఎన్నికల ప్రచారం ముగియనుంది. మరోవైపు, జనసేన పార్టీ తరపున పవన్ కళ్యాణ్ పోటీ చేస్తున్న పిఠాపురంలో ముఖ్యమంత్రి వైఎస్ జగన్ మోహన్ రెడ్డి తన చివరి ప్రచార సభను నిర్వహించనున్నారు.
ఈరోజు మూడు లోక్‌సభ నియోజకవర్గాల్లో సీఎం జగన్ ప్రచారం నిర్వహిస్తున్నారు. ఉదయం 10 గంటలకు నరసరావుపేట నియోజకవర్గం పరిధిలోని చిలకలూరిపేటలోని కళామందిర్ సెంటర్‌లో జరిగిన సభలో ఆయన పాల్గొన్నారు. అనంతరం మధ్యాహ్నం ఒంటిగంటకు ఏలూరు నియోజకవర్గం పరిధిలోని కైకలూరులో, చివరగా కాకినాడ నియోజకవర్గం పరిధిలోని పిఠాపురంలో జరిగే కార్యక్రమంలో పాల్గొంటారు. పిఠాపురంలో జరిగే ర్యాలీతో ఆయన ప్రచార పర్వం ముగియనుంది.
వైఎస్ఆర్ కాంగ్రెస్ పార్టీ మొదటి నుంచి పిఠాపురంపై దృష్టి సారిస్తోంది. పవన్ కళ్యాణ్ సామాజిక వర్గానికి చెందిన వంగగీతని రంగంలోకి దింపారు. సీఎం జగన్ తన ప్రచార ప్రసంగాల్లో పవన్ కల్యాణ్‌పై తీవ్ర విమర్శలు చేయడంతో పిఠాపురం ర్యాలీలో ఆయన ఏం మాట్లాడుతారనే దానిపై ఆసక్తి నెలకొంది.
