పొట్టకూటి కోసం ఆ భర్త విదేశాలకు వెళ్లాడు. ఇదే అదునుగా భావించిన భార్య మాత్రం భర్త ఎడబాటును పోగొట్టుకునేందుకు మరో వ్యక్తితో వివాహేతర సంబంధం పెట్టుకుంది. ఈ విషయం తెలుసుకున్న భర్త కుమిలిపోయాడు. తనకు ద్రోహం చేస్తున్న భార్యను రెడ్‌హ్యాండెడ్‌గా పట్టుకునేందుకు విదేశాల నుంచి స్వదేశానికి వచ్చి నిఘా పెట్టాడు. ఈ క్రమంలో అర్థరాత్రి ఇంటికెళ్లి తలుపుతట్టాడు. తలుపు తీయగానే ఇంట్లో కనిపించిన దృశ్యం చూసి నిర్ఘాంతపోయాడు. ఈ ఘటన హైదరాబాద్ నగరంలో జరిగింది.
ఈ వివరాలను పరిశీలిస్తే, సూర్యాపేట జిల్లా నడిగూడేనికి చెందిన వ్యక్తికి అదే జిల్లాకు చెందిన యువతితో పదేళ్ల క్రితం వివాహమైంది. ఆ తర్వాత కొన్ని రోజులకే హైదరాబాద్ వచ్చి కొత్తపేటలోని వాసవీకాలనీలో సొంత ఫ్లాట్ కొనుక్కుని కాపురం పెట్టారు. వీరికి ఇద్దరు పిల్లలు ఉన్నారు. ఇంజినీరింగ్ పూర్తిచేసిన భర్త ఎంఎస్ చదివేందుకు ఆరేళ్ల క్రితం ఆస్ట్రేలియాకు వెళ్లాడు. అప్పుడప్పుడు హైదరాబాద్ వచ్చి వెళ్లేవాడు.
ఈ క్రమంలో భర్త దూరంగా ఉండడంతో భార్య తన చిన్ననాటి స్నేహితుడైన వైద్యుడు శివప్రసాద్‌తో పరిచయం పెంచుకుంది. ఈ పరిచయం కాస్త అక్రమ సంబంధానికి దారితీసింది. ఈ విషయం తెలిసిన భర్త.. భార్యకు ఫోన్ చేసి హెచ్చరించాడు. అయినప్పటికీ ఆమె ప్రవర్తనలో ఎటువంటి మార్పు రాలేదు. దీంతో భార్యను రెడ్‌హ్యాండెడ్‌గా పట్టుకునేందుకు భార్యకు తెలియకుండా 20 రోజుల క్రితం రహస్యంగా హైదరాబాద్ చేరుకుని ఆమెపై నిఘాపెట్టాడు. ఆమె తప్పించుకోకుండా దొరకాలని సమయం కోసం ఎదురుచూశాడు. ఈ క్రమంలో శుక్రవారం అర్థరాత్రి భార్య, తన స్నేహితుడితో కలిసి ఉండగా వెళ్లి తలుపుకొట్టాడు.
తలుపు తెరిచిన భార్య నివ్వెరపోయింది. లోపలున్న శివప్రసాద్‌ను చూసి ఇక్కడ ఎందుకున్నావని భర్త ప్రశ్నించాడు. దీనికి అతడు స్పందిస్తూ.. తాను ఎప్పుడైనా వస్తానని, ఎక్కువ మాట్లాడితే చంపేస్తానని బెదిరించాడు. వారిద్దరి మధ్య వాగ్వివాదం జరిగింది. బాధిత భర్త అప్పటికే పోలీసులకు సమాచారం అందించడంతో వారు అదే సమయానికి అక్కడికి చేరుకుని శివప్రసాద్‌ను, బాధితుడి భార్యను అదుపులోకి తీసుకున్నారు. పోలీసులు వారితో మాట్లాడుతుండగానే అక్కడ మరో షాకింగ్ ఘటన జరిగింది.
ఆ ఇంట్లోని మరో గదిలో నిందితురాలి స్నేహితులైన నరేశ్, మరో యువతి పట్టుబడ్డారు. వీరు దంపతులు కాదని, వీరు కూడా వివాహేతర సంబంధం నెరుపుతున్నారని నిర్ధారించుకుని అందరినీ అరెస్ట్ చేశారు. వీరందరిపై వివిధ సెక్షన్ల కింద కేసు నమోదు చేసి దర్యాప్తు చేస్తున్నారు.
