ఆంధ్రప్రదేశ్ రాష్ట్ర ప్రభుత్వం విద్యార్థులకు శుభవార్త చెప్పింది. పాఠశాలలకు సంక్రాంతి సెలవులు పొడగించేందుకు సిద్ధమైనట్టు సమాచారం. నిజానికి ఏపీలో ఈ నెల 11వ తేదీ నుంచి 16వ తేదీ వరకు సంక్రాంతి సెలవులు ఇవ్వాలని నిర్ణయించారు. ఆ తర్వాత 17వ తేదీన స్కూల్స్ తెరుచుకోవాల్సివుంది.
కానీ, ఈ సెలవులను 18వ తేదీ వరకు పొడగించాలని ఏపీ ఉపాధ్యాయ సమాఖ్య, ఉపాధ్యాయ సంఘాల ప్రతినిధులు ఏపీ విద్యామంత్రి బొత్స సత్యనారాయణను కోరారు. దీనిపై ఆయన సానుకూలంగా స్పందించినట్టు సమాచారం. అయితే, సంక్రాంతి సెలవుల పొడగింపు వ్యవహారంలో రాష్ట్ర విద్యాశాఖ అధికారికంగా ప్రకటన చేయాల్సివుంది.
