సోషల్ మీడియాలో తెలుగుదేశం పార్టీని, నాయ‌కుల్ని, చివ‌రికి హైకోర్టు న్యాయమూర్తులు, న్యాయవ్యవస్థను కించపరిచే విధంగా సోషల్ మీడియాలో పోస్టులు పెట్టిన పంచ్ ప్రభాకర్ అరెస్టుకు రంగం సిద్ధం అవుతోంది. సోషల్ మీడియా పోస్టుల కేసులో సి.బి.ఐ తాజా అఫిడవిట్ దాఖలు చేసింది.
అఫిడవిట్ ను హైకోర్టులో సిబిఐ డైరెక్టర్ జైస్వాల్ ద‌గ్గ‌రుండి దాఖలు చేశారు. ఆ అఫిడవిట్ ని పిటిషనర్లకు పంపారు. న్యాయమూర్తులను కించపరిచేలా పదే పదే వీడియోలు పెడుతున్న పంచ్ ప్రభాకర్ కోసం నవంబర్ 1న లుక్ఔ ట్ సర్క్యులర్ హోం మంత్రిత్వ శాఖ ద్వారా జారీ చేశామని సిబిఐ పేర్కొంది.
ఇంటర్పోల్ జారీ చేసిన బ్లూ నోటీసు ద్వారా అమెరికాలోని ఎఫ్ బి ఐ (ఫెడరల్ బ్యూరో ఆఫ్ ఇన్వెస్టిగేషన్) అతని చిరునామాను కూడా త‌మ‌కు పంపిందని సి.బి.ఐ. పేర్కొంది. నవంబరు 8వ తేదీన పంచ్ ప్రభాకర్ ను అరెస్ట్ చేసేందుకు నాన్ బెయిలబుల్ వారెంట్ సంబంధిత కోర్టు నుంచి తీసుకున్న సి.బి.ఐ ఇపుడు ఆ ప్ర‌య‌త్నాల‌ను ముమ్మ‌రం చేసింది. ఈ నెల 9న ఇంటర్ పోల్ కు పంచ్ ప్రభాకర్ అరెస్టు రిక్వెస్ట్ ను పంపింది.
ప్రభాకర్ అరెస్ట్ కు సంబంధించి ఇంటర్పోల్ తో ఎప్పటికప్పుడు సంప్రదింపులు జరుపుతున్నామని సీబీఐ పేర్కొంది. పంచ్ ప్రభాకర్ తాజా వీడియోలపై ఈనెల 15న యూట్యూబ్ ఛానల్ తో వర్చువల్ గా సమావేశమైన సిబిఐ అధికారులు, వాటిని మొత్తం తొల‌గించాల‌ని కోరారు. ఈ కేసులో సంబంధం ఉన్న మిగతా వారందర్నీ విచారిస్తున్నామని సి.బి.ఐ పేర్కొంది. ఈ కేసులో 17వ నిందితుడిగా పంచ్ ప్రభాకర్ పేరును చేర్చామని సి.బి.ఐ పేర్కొంది.
