తమను ఎపుడు అరెస్టు చేస్తారా అని అమితాసక్తిగా ఎదురు చూస్తున్నట్టు వైకాపా నేత, మాజీ మంత్రి పేర్ని నాని అన్నారు. గత కొన్ని రోజులుగా తన అరెస్టుపై సాగుతున్న ప్రచారంపై ఆయన గురువారం స్పందించారు. తనపై ఇప్పటివరకు ఎలాంటి ఎఫ్.ఐ.ఆర్ నమోదు కాలేదన్నారు. అలాంటపుడు అరెస్టు ఎలా చేస్తారని ప్రశ్నించారు. దుమ్ముంటే తనను అరెస్టు చేయాలంటూ ప్రభుత్వానికి బహిరంగంగా సవాల్ విసిరారు.
మచిలీపట్నంలో పార్టీ కార్యకర్తలతో ఆయన సమావేశమయ్యారు. ఈ సందర్భంగా ఆయన మీడియాతో మాట్లాడుతూ, గత నెల రోజులుగా నన్ను అరెస్టు చేస్తారని కొన్ని మీడియా సంస్థలు పనిగట్టుకుని ప్రచారం చేస్తున్నాయి. నేను పారిపోతాననే ఉద్దేశంతో ఇలాంటి వార్తలు సృష్టిస్తున్నారు. కానీ, నేను ఎక్కడికి వెళ్లను. ఇక్కడే ఉంటాను అని ఆయన తేల్చిచెప్పారు.
ఇది కేవలం పచ్చమీడియా చేస్తున్న ప్రచారమని, వారి సుకానందం కోసమే ఇలాంటి వార్తలు రాస్తున్నారని వ్యాఖ్యానించారు. కూటమి ప్రభుత్వం అధికారంలోకి వచ్చి యేడాది పూర్తయిన నేపథ్యంలో ప్రజల దృష్టిని మరల్చేందుకే తన అరెస్టు అంశాన్ని తెరపైకి తెచ్చారని పేర్ని నాని ఆరోపించారు.
