సూసైడ్‌పై టార్గెట్: పూరీ "నేనూ - నా రాక్షసి"
, శనివారం, 30 ఏప్రియల్ 2011 (13:13 IST)
నటీనటులు: రానా, ఇలియానా, సుబ్బరాజు, అలీ, కోటశ్రీనివాసరావు, ముమైత్‌ఖాన్‌ తదితరులు. కెమెరా: అమోల్‌ రాథోడ్‌, సంగీతం: విశ్వ రెహమాన్‌, ఎడిటర్‌: ఎస్‌.ఆర్‌.శేఖర్‌, నిర్మాత: నల్లమలుపు శ్రీనివాస్‌ (బుజ్జి), రచన, దర్శకత్వం: పూరీజగన్నాథ్‌. సమర్పణ: బేబీ భవ్య.పాయింట్‌: ఆత్మహత్యలు చేసుకొనేవారు ఎంతటి క్షోభను అనుభవిస్తారనేది తెలియజెప్పే పాయింట్‌."
ఇట్లు శ్రావణిసుబ్రహ్మణ్యం" చిత్రం చూసినవారికి ఆ సినిమా గుర్తుండే ఉంటుంది. యువతీ,యువకుడు ఆత్మహత్య చేసుకోవడానికి అనుకోకుండా రావడంతో వారిలో ప్రేమ చిగురిస్తుంది. చివరికి బతకాలని ఒకరికోసం ఒకరవుతారు. గీతాంజలిలో ఇద్దరు వ్యాధిగ్రస్తులు చనిపోదామనుకుని చివరిలో బతకాలనే ఆశతో ఉంటారు. ఇలా ఆత్మహత్యలు చేసుకోవాలనుకునే కథల్లోంచి పుట్టిన కొత్త కాన్సెప్ట్‌ "నేను నా రాక్షసి"కథలోకి వెళితే.... ఇలియానా మెడకు ఉరి వేసుకుని ఆత్మహత్యకు పాల్పడే ఘటనతో కథ ఆరంభమవుతంది. ఆ తర్వాత ఈమె గురించి ఫ్లాష్‌బ్యాక్‌ వస్తుందేమోనని ప్రేక్షకుడు అనుకుంటాడు. అయితే అలాక్కాదు. ఇందులో ఇలియానా ద్విపాత్రాభినయం అని తర్వాత తెలుస్తుంది. అభిరామ్‌ (రానా) కిరాయి గన్‌తో హత్యలు చేస్తుంటాడు. దీనిద్వారా వచ్చిన డబ్బును కోమాలో ఉన్న తన తల్లిని కాపాడేందుకు ఉపయోగిస్తాడు. మరోవైపు మీనాక్షి (ఇలియానా) ఓ కాఫీబార్‌లో ఉద్యోగం చేస్తుంది. అభి, మీనాక్షి ఒకరికొకరు పలుసార్లు తారసపడతారు. ఈమెను చూడగానే అభికి ప్రేమ చిగురిస్తుంది. ఈమె ప్రవృత్తి మాత్రం ఆత్మహత్య చేసుకొనేవారి చివరి కోరిక ప్రకారం ఎలా చనిపోతున్నారో కెమెరాతో షూట్‌ చేస్తుంది. 'ఐ హేట్‌ మై లైఫ్‌' అనే పేరుతో యూ ట్యూబ్‌లో అవన్నీ అప్‌లోడ్‌ చేస్తుంది.
సిటీలో జరిగే సంఘటనలు వెంటవెంటనే అప్‌లోడ్‌ కావడంతో పోలీసు యంత్రాంగం దృష్టిపెడుతుంది. ఓసారి తను చనిపోవాలనుకుని మీనాక్షి నడిపే యుట్యూబ్‌కు మెసేజ్ పంపుతాడు. ఆమె వచ్చి అభి ఆత్మహత్య చేసుకునే సన్నివేశాన్ని షూట్‌ చేస్తుంది. కత్తితో పొడుచుకుంటున్నప్పుడు ఆమె వేసుకున్న మాస్క్‌ ఊడిపోతుంది. తను ప్రేమించిన అమ్మాయే తన ఆత్మహత్యను షూట్‌ చేస్తుందని తెలుసుకుని రక్షించమంటాడు. '
ఇది నా పనికాదు. జరిగింది షూట్‌ చేయడమే నా పనంటూ' వెళ్ళిపోతుంది. ఓసీ రాక్షసి అంటూ తిడతాడు అభి. ఆ తర్వాత పోలీసు ఇన్వెస్టిగేషన్‌లో మీనాక్షి యూట్యూబ్‌ నడుపుతుందని తెలుసుకుని ఆమెను అరెస్ట్‌ చేయడానికి ప్రయత్నిస్తారు. ఆ సందర్భంలో అభి వచ్చి రక్షిస్తాడు. మరోవైపు అభిని చంపడానికి ఓ రౌడీ వెంటాడుతుంటాడు. వీరిద్దరినుంచి తప్పించుకోవాలంటే వెనీస్‌కు వెళదామని విదేశాలకు వెళతారు. అక్కడ కూడా అటు పోలీసులు, ఇటు రౌడీగ్యాంగ్‌ వచ్చి వీరిని చంపడానికి ప్రయత్నిస్తారు. తను ఎలాగో కొద్దిరోజుల్లో ఆత్మహత్య చేసుకుంటానని అది షూట్‌ చేయమని అభికి మీనాక్షి చెబుతుంది. ఇలా ఇద్దరూ చివరిలో ఆత్మహత్య చేసుకుంటారు. అయితే సినిమాలో ఏం చెప్పారు? అసలు మొదటసారి కత్తితో పొడుచుకున్న అభి ఎలా బతికాడు? ఇవి తెలుసుకోవాలంటే చిత్రం చూడండి.. ఎందుకూ ఈ గొడవ అనుకుంటే మీ ఇష్టం.ఇటువంటి కథలు హాలీవుడ్‌ కల్చర్‌కు తగిన విధంగా ఉంటాయి. కానీ మొదటి భాగాన్ని చక్కగా ఎవరికి ఎవరు అనేది ఇంట్రస్ట్‌గా తెలీయకుండా చూపించి రెండో భాగాన్ని ఏకంగా వెనీస్‌కు తీసుకెళ్ళి తెలుగు నేటివిటీకి దూరం చేశాడు. అసలు కథే కొత్తగా ఉంది. ఇదొక ప్రయోగమని మొదటనుంచీ చెబుతున్న పూరీకి మాత్రం నిజంగానే కొత్తగా అనిపించి ఉంటుంది. కానీ సామాన్య ప్రేక్షకుడికి ఈ గొడవేంటి అనిపిస్తుంది.
