'వైఎస్ఆర్' భార్యగా తమిళ దర్శకుడి లవర్... ఓకే చెప్పిన కేరళ కుట్టి
మహానేత దివంగత మాజీ ముఖ్యమంత్రి వైఎస్.రాజశేఖర్ రెడ్డి జీవిత చరిత్ర ఆధారంగా ఓ చిత్రం తెరకెక్కనుంది. ఈ చిత్రంలో వైఎస్ఆర్ పాత్రను మలయాళ సూపర్ స్టార్ మమ్ముట్టి నటించనున్నారు.
మహానేత దివంగత మాజీ ముఖ్యమంత్రి వైఎస్.రాజశేఖర్ రెడ్డి జీవిత చరిత్ర ఆధారంగా ఓ చిత్రం తెరకెక్కనుంది. ఈ చిత్రంలో వైఎస్ఆర్ పాత్రను మలయాళ సూపర్ స్టార్ మమ్ముట్టి నటించనున్నారు. ఈ చిత్రంలో వైఎస్ఆర్ భార్యగా నటించేందుకు పలువురు హీరోయిన్ల పేర్లను పరిశీలించారు. అయితే, చిత్ర దర్శకుడు, నిర్మాత మాత్రం కేరళ కుట్టి నయనతారను ఎంపిక చేసినట్టు వార్తలు వస్తున్నాయి.
గతంలో మమ్ముట్టి - నయనతార కాంబినేషన్‌లో వచ్చిన 'భాస్కర్ ది రాస్కెల్', 'పుతియా నియమం' వంటి పలు చిత్రాలు సూపర్ డూపర్ హిట్ అయ్యాయి. దీంతో వీరిద్దరి కాంబినేషన్‌లో వైఎస్ఆర్ బయోపిక్‌ను నిర్మించాలని దర్శకనిర్మాతలు నిర్ణయించారు.
కాగా, ఈ చిత్రానికి 'ఆనందో బ్రహ్మ' సినిమాతో హిట్ కొట్టిన మహి వి.రాఘవ్ దర్శకత్వం వహించనున్నట్టు తెలుస్తోంది. ప్రస్తుతం స్క్రిప్ట్ వర్క్‌ను పూర్తి చేసుకుంటోన్న ఈ సినిమా, త్వరలోనే సెట్స్‌పైకి వెళ్లనుంది.
అలాగే, నయనతార తన ప్రియుడు తమిళ యువ దర్శకుడు విఘ్నేష్ శివన్‌తో కలిసి యూఎస్‌లో సమ్మర్ వెకేషన్స్‌ను ఎంజాయ్ చేస్తోంది. దీనికి సంబంధించిన పలు ఫోటోలను కూడా ఆమె తాజాగా తన ఇన్‌స్టాగ్రామ్‌లో కూడా పోస్ట్ చేసింది.
