హైదరాబాద్ ఎస్.ఆర్. నగర్ పోలీసుస్టేషన్ గోడను పోలీసులు కూల్చేశారు. వాస్తు దోషం ఉందని భావించిన పోలీసులు గోడను కూలుస్తున్నట్టు సమాచారం. ఎస్.ఆర్. నగర్ పోలీసుల పనితీరుపై విమర్శలు రావడం.. ఇక్కడ పనిచేసే అధికారులపై పోలీసు ఉన్నతాధికారులు సీరియస్‌గా ఉండటంతో ఇదంతా వాస్తుదోషమేనని.. గ్రహాలు అనుకూలంగా లేకపోవడమే కారణమని భావించి.. గోడను కూల్చితే అంతా మంచి జరుగుతుందని.. ఈ పని చేసినట్టు భావిస్తున్నారు.
గతంలో ఎస్.ఆర్. నగర్ పోలీసులు ఓ వైన్ షాప్ వద్ద పోలీసు వ్యానుని నిలిపి.. మద్యం బాటిళ్లు పట్టుకెళ్లడంతో పాటు.. పోలీసుల పనితీరుపై ఉన్నతాధికారులు అసంతృప్తి వ్యక్తం చేసిన దాఖలాలు ఉన్నాయ్.. దాంతో గోడను కూల్చి.. ప్రవేశ ద్వారాన్ని మార్చితే మంచి జరుగుతుందని భావిస్తున్నారు పోలీసులు.
గోడను కూల్చే పనులతో అటుగా వెళ్లే వాహనాలను వెళ్లనివ్వకుండా.. పోలీసు స్టేషన్ ముందు రోడ్డంతా బ్యారికేడ్లతో మూసేశారు. దాంతో వాహనదారులు ఇబ్బందులకు గురయ్యారు. వాస్తుపీడ పోలీసులను వేధిస్తోందని.. శాంతి చేకూరాలనే ఇదంతా చేస్తున్నట్టు పోలీసువర్గాలు చెప్తున్నాయ్.
