హైదరాబాద్ నగరంలో ఓ విషాదకర ఘటన జరిగింది. స్మైల్ డిజైనింగ్ ఆపరేషన్ వికటించింది. అనెస్థీషియా వైద్యుడు అధిక మోతాదులో మత్తు ఇవ్వడంతో ఈ అపరేషన్ వికటించింది. ఫలితంగా కాబోయే వరుడు కుప్పకూలి ప్రాణాలు విడిచాడు. హైదరాబాద్ నగరంలోని జూబ్లీహిల్స్ ప్రాంతంలో తాజాగా వెలుగులోకి వచ్చిన ఈ వివరాలను పరిశీలిస్తే,
హైదరాబాద్ నగరానికి చెందిన లక్ష్మీనారాయణ వింజం (28) అనే యువకుడికి ఇటీవల వివాహం కుదిరింది. ఈ క్రమంలో తన ముఖంపై చిరునవ్వును తీర్చిదిద్దుకోవాలని కాబోయే వరుడు భావించాడు. ఇందుకోసం జూబ్లీ హిల్స్‌లోని ప్రముఖ దంత వైద్యశాలకు చెందిన వైద్యులను సంప్రదించారు. స్మైల్ డిజైనింగ్ ఆపరేషన్ ద్వారా ముఖంపై చిరునవ్వు ఉండేలా తీర్చిదిద్దుతామని వైద్యులు నమ్మించారు. అయితే, ఈ విషయాన్ని లక్ష్మీనారాయణ కుటుంబ సభ్యులకు చెప్పకుండా ఆస్పత్రికి వెళ్లి ఆపరేషన్ చేయించుకున్నాడు.
ఈ ఆపరేషన్ ముగిసిన కొద్దిసేపటికే లక్ష్మీనారాయణ కుప్పకూలిపోయాడు. దీంతో ఆస్పత్రి సిబ్బంది వెంటనే కుటుంబ సభ్యులకు ఫోన్ చేసి సమాచారం చేరవేశారు. ఆ వెంటనే ఆగమేఘాలపై తల్లిదండ్రులు ఆస్పత్రికి చేరుకోగానే లక్ష్మీనారాయణ అపస్మారక స్థితిలో ఉన్నాడని బాధితుడి తండ్రి రాములు తెలిపారు.
అక్కడ నుంచి హుటాహుటిన దగ్గర్లోన ఆసుపత్రికి తరలించగా.. అప్పటికే చనిపోయాడని వైద్యులు చెప్పారన్నారు. దీనిపై రాములు వింజం పోలీసులను ఆశ్రయించారు. దంత వైద్యులు నిర్లక్ష్యంగా వ్యవహరించడం, అనెస్థీషియా ఓవర్ డోస్ కారణంగానే తమ కొడుకు చనిపోయాడని ఫిర్యాదు చేశారు. దీంతో పోలీసులు కేసు నమోదు చేసి విచారణ జరుపుతున్నారు.
