భారత స్టార్ బౌలర్ హర్భజన్ సింగ్‌పై టీమిండియా కెప్టెన్ మహేంద్ర సింగ్ ధోనీ ప్రశంసల వర్షం కురిపించాడు. దక్షిణాఫ్రికాతో జరిగిన మూడో వన్డే అత్యద్భుత ఆటతీరును ప్రదర్శించిన భజ్జీ, మాకు లభించిన ఓ మంచి ఆల్‌రౌండర్ అని ధోనీ కితాబిచ్చాడు.
దక్షిణాఫ్రికా క్లిష్టపరిస్థితుల్లో ఎలాంటి ఒత్తిడికి లోనుకాకుండా మెరుగ్గా బౌలింగ్ చేయగలడని, ఇంకా భజ్జీ మాకు లభించిన సూపర్ ఆల్‌రౌండర్ అని ధోనీ కొనియాడాడు. ఉత్కంఠ భరితంగా మ్యాచ్ జరుగుతుండగా 23 పరుగులు సాధించి జట్టును గెలిపించడంలో భజ్జీ కీలక పాత్ర పోషించాడని ధోనీ ప్రశంసించాడు. మంగళవారం కేప్‌టౌన్‌లో దక్షిణాఫ్రికాతో జరిగిన మ్యాచ్‌లో భారత్ రెండు వికెట్ల తేడాతో భారత్ థ్రిల్ విజయాన్ని నమోదు చేసుకున్న సంగతి తెలిసిందే.
ఈ సందర్భంగా అటు బౌలింగ్‌లో రాణించి ఒక వికెట్ తీయడమే కాకుండా, బ్యాటింగ్‌లోనూ 59 పరుగులు చేసి జట్టు విజయంలో కీలక పాత్ర పోషించిన యూసుఫ్ పఠాన్‌పై ధోనీ ప్రశంసలతో ముంచెత్తాడు. ఇంకా టీమిండియాలో యువ క్రీడాకారులు అద్భుతంగా ఆడుతున్నారు. భారత క్రికెటర్ల బ్యాటింగ్, బౌలింగ్ తీరు మెరుగైందని ధోనీ పేర్కొన్నాడు.
