కెనడా అందగత్తెలుగా భారత సంతతికి చెందిన నటి లీసారే, కెనడా రాజకీయ నాయకురాలు రూబీధల్లాలు చోటు సంపాదించారు. "హలో మేగజీన్" విడుదల చేసిన 50 మంది సుందరాంగుల జాబితాలో ఈ ఇద్దరు ఎన్నారై సుందరాంగులు చోటు దక్కించుకున్నారు.
కాగా... సిక్కు సంతతికి చెందిన రూబీధల్లా, కెనడా రాజకీయాల్లో మోస్ట్ బ్యూటిఫుల్ రాజకీయ నాయకురాలిగా గుర్తింపు పొందారు. ఇక లీసారే, దీపామెహతా రూపొందించిన "వాటర్" అనే సినిమాతో మంచి గుర్తింపును సంపాదించుకుంది. ఇదిలా ఉంటే... లీసారే తెలుగు చిత్రం "టక్కరి దొంగ"లో కూడా నటించించిన సంగతి పాఠకులకు విదితమే.
ఈ సందర్భంగా లీసారే మీడియాతో మాట్లాడుతూ... "ఈ జాబితాలో స్థానం లభిస్తుందని తాను ముందుగానే ఊహించానని, ఇందుకు తన కుటుంబ సభ్యులకు ధన్యవాదాలు తెలుపుకుంటున్నానని" అని సంతోషం వ్యక్తం చేసింది. కాగా... 37 సంవత్సరాల లీసారే టొరంటోలో జన్మించింది. ఈమె తండ్రి బెంగాల్‌కు చెందినవారు.
మొదట జర్నలిజం విద్యను అభ్యసించాలని అనుకున్న లీసారే... ఆ తరువాత మోడలింగ్ రంగంలోకి ప్రవేశించి, ఆపై నటిగా నిలదొక్కుకుంది. ఇకపోతే... కెనడా గాయకుడు షానియా త్వైన్ ఈ సుందరాంగుల జాబితాలో మొదటి స్థానంలో నిలిచాడు.
