తరుణ్ తేజ్‌పాల్ దోషిగా తేలితే ఏడేళ్లకుపైగా జైలు శిక్ష!
, మంగళవారం, 18 ఫిబ్రవరి 2014 (08:52 IST)
తెహల్కా పత్రిక వ్యవస్థాపక సంపాదకుడు తరుణ్ తేజ్‌పాల్ (50)పై గోవా పోలీసులు నమోదు చేసిన అత్యాచారం, లైంగిక వేధింపులు రుజువైన పక్షంలో ఆయనకు ఏడేళ్ళ జైలుశిక్ష పడే అవకాశం ఉంది. ఆయన గత ఏడాది నవంబర్‌లో పణజీలోని గ్రాండ్ హయత్ ఫైవ్‌స్టార్ హోటల్ లిఫ్టులో తన జూనియర్ మహిళా జర్నలిస్టుపై అత్యాచారం, తదితర నేరాలకు పాల్పడ్డారని, ఇందుకు తగిన ఆధారాలు ఉన్నాయని చార్జిషీట్‌లో పేర్కొన్నారు. పలు సంచలనాత్మక స్టింగ్ ఆపరేషన్లు నిర్వహించిన తేజ్‌పాల్ ఈ అభియోగాల కింద దోషిగా తేలితే ఏడేళ్లకుపైగా జైలు శిక్ష పడే అవకాశం ఉందని న్యాయ నిపుణులు అభిప్రాయపడుతున్నారు. కాగా, తరుణ్ తేజ్‌పాల్‍పై ఐపీసీ 354, 354-ఎ (లైంగిక వేధింపులు), 341, 342(అక్రమ నిర్బంధం), 376 (అత్యాచారం), 376(2)(ఎఫ్), 376(2)(కె) (అధికార దుర్వినియోగం, తన నిర్బంధంలోని మహిళపై రేప్) సెక్షన్ల కింద అభియోగాలు నమోదు చేసినట్టు దర్యాప్తు అధికారిణి సునీతా సావంత్ వెల్లడించారు. ఈ అభియోగాలతో మొత్తం 2,684 పేజీల చార్జిషీట్‌ను తయారు చేసి గోవా చీఫ్ జ్యుడీషియల్ మేజిస్ట్రేట్ అనూజా ప్రభుదేశాయ్‌కు సమర్పించారు.
