పార్టీ అధ్యక్ష పదవీకాలాన్ని ఐదేళ్లకు పొడగిస్తున్నట్లు ఆదివారం జరిగిన కాంగ్రెస్ ప్లీనరీ సమావేశంలో ఏఐసీసీ సంచలన నిర్ణయం తీసుకుంది. ప్రస్తుతం పార్టీ అధ్యక్ష పదవీ కాలం మూడేళ్లుగా ఉంది. అయితే దీనిని ఐదేళ్ళకు పొడిగించాలని ప్రతిపాదిస్తూ తీర్మానం ప్రవేశపెట్టారు. ఈ తీర్మానాన్ని సభ్యులందరూ ఏకగ్రీవంగా ఆమోదించారు.
దేశ రాజధాని న్యూడిల్లీలో జరుగుతున్న 83వ కాంగ్రెస్ ప్లీనరీ సమావేశంలో ఈ తీర్మానం చేయడం జరిగింది. తాజా తీర్మానంతో ఇకపై అధ్యక్ష ఎన్నికలు ఐదేళ్ళకు ఒకసారి మాత్రమే జరగనున్నాయి. పార్టీ సీనియర్ నేత ఆస్కార్ ఫెర్నాండేజ్ ఈ తీర్మానాన్ని ప్రవేశపెట్టగా.. ప్రధానమంత్రి మన్మోహన్ సింగ్, కేంద్ర ఆర్థికమంత్రి ప్రణబ్ ముఖర్జీ, రక్షణ మంత్రి ఏకె ఆంటోనీ, పార్టీ జనరల్ సెక్రటరీ రాహుల్ గాంధీతో సహా పలువురు ఇతర నేతలు ఈ తీర్మానానికి అంగీకారం తెలిపారు.
