ముఖ్యమంత్రి ఎన్.కిరణ్ కుమార్ రెడ్డి తన సొంత జిల్లా తొలి పర్యటనలో అడ్డంకులు ఎదురయ్యాయి. సీఎం కాన్వాయ్‌ను వైఎస్.జగన్మోహన్ రెడ్డి వర్గీయులు అడ్డుకున్నారు. దీంతో అక్కడ ఉద్రిక్త పరిస్థితులు నెలకొనడంతో పోలీసులు తమ లాఠీలకు పని చెప్పారు. ఈ లాఠీఛార్జ్‌లో తుడా మాజీ ఛైర్మన్ చెవిరెడ్డి భాస్కర్ రెడ్డికి తీవ్రగాలయ్యాయి.
రెండు రోజుల పర్యటనలో భాగంగా ముఖ్యమంత్రి కిరణ్ కుమార్ రెడ్డి శుక్రవారం చిత్తూరు జిల్లా పర్యటనకు వెళ్లిన విషయం తెల్సిందే. హైదరాబాద్ నుంచి రేణిగుంట విమానాశ్రయానికి చేరుకున్న ఆయన.. అక్కడ నుంచి కారులో తిరుమల శ్రీవారి దర్శనానికి బయలుదేరారు. అయితే, తిరుపతిలో జగన్ వర్గీయులు చెవిరెడ్డి భాస్కర్ రెడ్డి నేతృత్వంలో వందలాది మంది కార్యకర్తలు సీఎం కాన్వాయ్ ప్రయాణించే రహదారుల్లో రోడ్డుకు అడ్డంగా నల్లజెండాలతో బైఠాయించారు.
పోలీసులు ఎంత సర్దిచెప్పినా వారు పట్టించుకోలేదు. దీంతో కొద్దిసేపు పోలీసులకు, జగన్ వర్గీయులకు తోపులాట జరిగింది. అదేసమయంలో సీఎం కాన్వాయ్ వస్తుందని తెలియడంతో ఆందోళనకారులను చెదరగొట్టేందుకు లాఠీలకు పని చెప్పారు. ఈ దాడిలో చెవిరెడ్డి కూడా గాయపడ్డారు. తన సొంత జిల్లా చిత్తూరులో సీఎంకు ఈ తరహా అడ్డంకులు ఎదురుకావడం గమనార్హం.
