కడప మాజీ పార్లమెంట్ సభ్యుడు వైఎస్.జగన్మోహన్ రెడ్డి వచ్చే యేడాది జనవరి నెలలో చేపట్టనున్న ఓదార్పు యాత్రతో నిజమైన అగ్నిపరీక్ష ఎదురుకానుంది. జనవరి రెండో తేదీ నుంచి ఆయన ఉత్తర కోస్తా జిల్లాల్లో తన ఓదార్పు యాత్రను చేపట్టేందుకు ఏర్పాట్లు చేస్తున్నారు. ఈ యాత్రలోనే జగన్ భవితవ్యం తేలిపోతుందని పలువురు విశ్లేషకులు అభిప్రాయపడుతున్నారు.
ఇప్పటి వరకు చేపట్టిన ఓదార్పు యాత్ర కాంగ్రెస్ పార్టీ ఎంపీ హోదాలో చేపట్టారు. దీనికి అధిష్టానం వద్దంటున్నా.. జగన్ గట్టి పట్టుదలతో ముందుకు సాగారు. ప్రస్తుతం ఆయన తన ఎంపీ పదవితో పాటు కాంగ్రెస్ పార్టీ ప్రాథమిక సభ్యత్వానికి రాజీనామా చేశారు. ఈ నేపథ్యంలో జనవరిలో చేపట్టే ఓదార్పు యాత్రకు కాంగ్రెస్ శ్రేణుల నుంచి ఎలాంటి సహాయక సహకారాలు అందుతాయో ఆసక్తికరంగా మారింది.
మరోవైపు ఈ యాత్రకు పార్టీ శ్రేణులు, కాంగ్రెస్ నేతలను దూరంగా ఉంచాలని ముఖ్యమంత్రి కిరణ్ కుమార్ రెడ్డి ఇప్పటి నుంచే భారీ కసరత్తు చేస్తున్నారు. ఇదే అంశంపై ఇప్పటికే ఆయా జిల్లాల నేతలకు ఆదేశాలను కూడా జారీ చేశారు. జగన్ ఓదార్పు యాత్రకు దూరంగా ఉండటమే కాకుండా ఎలాంటి సహాయం చేయరాదని, ముఖ్యంగా, కిందిస్థాయి కార్యకర్తలను సైతం దూరంగా ఉంచాలని కేకేఆర్ ఆదేశించినట్టు సమాచారం.
ఇదిలావుండగా, కోస్తా జిల్లాలకు చెందిన మాజీ మంత్రి కొణతాల రామకృష్ణ జగన్ వర్గానికి మద్దతు ప్రకటించారు. ఇది జగన్ వర్గీయులను మరింత ఉత్సాహ పరిచేలా ఉంది. కొణతాలతో పాటు.. మరికొంతమంది నేతలు కూడా మన్ముందు జగన్‌కు మద్దతు పలికేందుకు సిద్ధంగా ఉన్నట్టు తెలుస్తోంది.
