కాంగ్రెస్ మహిళా నేత ప్రియాంకా గాంధీ పట్ల ఉత్తరప్రదేశ్ పోలీసుల్ అమర్యాదగా ప్రవర్తించారు. ఆమె కుర్తా పట్టుకుని లాగేందుకు ఓ పోలీస్ ప్రయత్నించాడు. దీనికి సంబంధించి వీడియో ఒకటి సోషల్ మీడియాలో వైరల్ అయింది. దీన్ని చూసిన యూపీ పోలీస్ ఉన్నతాధికారులు తీవ్రంగా పరిగణిస్తూ, ప్రియాంకా గాంధీకి క్షమాపణలు చెప్పారు. ఈ ఘటనపై మహిళా పోలీసు అధికారితో దర్యాప్తు జరిపించనున్నట్టు చెప్పారు. మహిళల భద్రత, వారి గౌరవానికి కట్టుబడి ఉన్నామని పేర్కొన్నారు.
హత్రాస్ హత్యాచార బాధిత కుటుంబాన్ని పరామర్శించేందుకు తాజాగా తన అన్న రాహుల్ గాంధీతో కలిసి ప్రియాంకా గాంధీ ఈ నెల 3వ తేదీ బయలుదేరారు. ఈ క్రమంలో నోయిడా ఫ్లైఓవర్ వద్ద పోలీసులు వారిని అడ్డుకున్నారు.
ఈ సందర్భంగా కాంగ్రెస్ కార్యకర్తలపై లాఠీచార్జ్ చేశారు. దీంతో పోలీసుల బారి నుంచి కార్యకర్తలను రక్షించేందుకు ప్రియాంక పరుగున ముందుకు వెళ్లారు. దీనిని గమనించిన ఓ పోలీసు ప్రియాంక కుర్తా పట్టుకుని లాగేందుకు ప్రయత్నించాడు. దీంతో ప్రియాంక కింద పడబోయారు. ఇందుకు సంబంధించిన వీడియోలు, ఫొటోలు వైరల్ అయ్యాయి.
ఈ ఘటనను తీవ్రంగా పరిగణించిన పోలీసు ఉన్నతాధికారులు తీవ్ర విచారం వ్యక్తం చేస్తూ క్షమాపణలు చెప్పారు. ప్రియాంకపై పోలీసులు అసభ్యంగా ప్రవర్తించారని, ఈ ఘటనపై మహిళా పోలీసు అధికారితో దర్యాప్తు జరిపించనున్నట్టు చెప్పారు. మహిళల భద్రత, వారి గౌరవానికి కట్టుబడి ఉన్నామని పేర్కొన్నారు.
