కంటిచూపు, కండరాల దృఢత్వానికి ములగ
, సోమవారం, 21 జనవరి 2013 (21:55 IST)
ములగ ఆకుల్లోనూ, కాడల్లోనూ, క్యాల్షియం, విటమిన్-ఎ పుష్కలంగా ఉంటాయి. కాబట్టి ఇది ఎముకలకు బలం కలిగిస్తుంది. నేత్రవ్యాధులు రాకుండా కాపాడుతుంది. దీని ఆకులను దంచి రసం తీసి ఒక చెంచా మోతాదులో సమానంగా తేనే, లేక చక్కెర కలిపి రోజూ సేవిస్తే కండరాలు, ఎముకలు దృఢంగా ఉంటాయి. కంటిచూపు అమోఘంగా ఉంటుంది. చర్మరోగాలు రాకుండా నివారితమవుతాయి. దీని ఆకుల్ని పప్పులో కలిపి ఉడికించి తింటారు. కాడల్ని సాంబారులో వేస్తారు. ఈ కాడల్లోని విత్తులు తినడం వల్ల కడుపులోని క్రిములు నశిస్తాయి. ఈ గింజల్ని ఎండించి, చూర్ణంగా తయారుచేసి, సస్యంలాగ పీలిస్తే, దీర్ఘకాలపు శిరశ్శూలలు దూరమౌతాయి. ఒక చెంచా మునగ ఆకుల రసంలో ఒక చెంచా ఉల్లిపాయరసం కలిపి, రెండు పూటలా బహిష్టు సమయంలో తాగితే స్త్రీలలో వచ్చే బహిష్టు కడుపునొప్పి తగ్గుతుంది. ఆకులముద్దను నువ్వుల నూనెతో కలిపి, పట్టు వేస్తే వాపులు, సెగ్గడ్డలు, కీళ్లనొప్పులు తగ్గుతాయి. ఈ చెట్టు వేళ్లను దంచి, రసం తీసి ఒక చెంచా మోతాదులో పాలతో రోజూ రెండు పూటలా తాగితే మూత్ర పిండంలో రాళ్లు కరిగిపోతాయి. దీనివల్ల బ్రెయిన్ ట్యూమర్లు కూడా తగ్గుతాయన్న పరిశీలన కూడా ఉంది.
