మన శరీరంలో సాధారణంగా ఎడమభాగం కంటే కుడి భాగం కొంచెం పెద్దదిగా ఉంటుంది. అదేవిధంగా మెదడులో కూడా కుడి, ఎడమ అని రెండు భాగాలుంటాయి. ఈ రెండు భాగాల పనితీరుతో కూడా స్వల్ప వ్యత్యాసం ఉంటుంది. ఎడమ మెదడు నరాలు మెదడు మీదుగా శరీరంలోని కుడివైపు ఉండే అవయవాలతో కలిసి ఉన్నవాళ్లు కుడిచేతి వాటం వాళ్లు అవుతారు.
కానీ కొందరిలో మాత్రం కుడివైపు మెదడు నరాలు మెడమీదుగా శరీరంలోని ఎడమ భాగంతో కలిసి వుంటాయి. అటువంటి వారిలో ఎడమ భాగం ఎక్కువగా స్పందిస్తుంది. అటువంటి వారు పనులన్నింటినీ ఎడమ చేతితోనే చేస్తారు.
అందుకే కొందరు పిల్లలు బాల్యం నుంచే ఎడమ చేతితో రాయటం, ఎడమ చేతితో తినటం, ఎడమ చేతితోనే కరచాలనం చేయడం వంటివి చేస్తుంటారు. తల్లిదండ్రులు వారిని ఎంత వారించినా, వారు తమ అలవాటును మార్చుకోలేరు.
కారణం వారి మెదడు పనితీరు అలాగే ఉంటుంది కాబట్టి. అందుకే అటువంటి వారిని అలానే వదిలేయడం మంచిదని చైల్డ్ కేర్ నిపుణులు అంటున్నారు.
