కెనడాలో మరోమారు ఖలిస్థానీ మద్దతుదారులు రెచ్చిపోయారు. కెనడాలోని బ్రాంప్టన్‌లోని హిందూ సభ మందిర్ వద్ద మహిళలు, పిల్లలు, సహా భక్తులపై భౌతికదాడికి తెగబడ్డారు. ఆలయం వెలుపల ఉన్న భక్తులపై కొందరు వ్యక్తులు కర్రలు చేతపట్టుకుని దాడి చేశారు. ఈ దాడికి సంబంధించిన వీడియో దృశ్యాలు ఇపుడు నెట్టింట వైరల్‌గా మారాయి.
మరోవైపు, ఈ దాడికి కెనడా ప్రధాని జస్టిన్ ట్రూడో తీవ్రంగా ఖండించారు. దేశంలో హింసాత్మక చర్యలు ఆమోదయోగ్యం కాదన్నారు. ఆదివారం నాడు హిందూ సభ మందిర్‌లోని భక్తులపై ఖలీస్థానీ మద్దతుదారులు దాడి చేయడం అమానుషం అన్నారు. ఈ మేరకు సోషల్ మీడియా వేదికగా ట్రూడో ఈ దాడిని ఖండిస్తూ పోస్ట్ చేశారు.
బ్రాంప్టన్‌లోని హిందూ సభ మందిర్‌లో జరిగిన హింసాత్మక చర్యలు ఆమోదయోగ్యంకాదు. ప్రతి కెనడియన్‌కు తమ విశ్వాసాన్ని స్వేచ్ఛగా, సురక్షితంగా ఆచరించే హక్కు ఉంది. ఈ సంఘటనపై త్వరగా స్పందించి బాధితులను కాపాడినందుకు పీల్ ప్రాంత పోలీసులకు ధన్యవాదాలు. అంతేకాకుండా, వేగంగా దర్యాప్తు చేయడం ప్రశంసనీయం అని ట్రూడో తన పోస్టులో పేర్కొన్నారు. అలాగే, కెనడాలోని హిందూ సంఘాలు కూడా ఈ దాడి ఘటనను తీవ్రంగా ఖండిస్తున్నాయి.
