టెస్లా చీఫ్ ఎగ్జిక్యూటివ్ ఆఫీసర్ ఎలోన్ మస్క్ అమెరికా ప్రభుత్వంలోని డిపార్ట్‌మెంట్ ఆఫ్ గవర్నమెంట్ ఎఫిషియన్సీ (DOGE) చైర్మన్ పదవికి రాజీనామా చేస్తున్నట్లు ప్రకటిస్తూ సంచలనాత్మక ప్రకటన చేశారు. ఈ విషయాన్ని సోషల్ మీడియా ప్లాట్‌ఫామ్ ఎక్స్‌ ద్వారా ఈ ప్రకటన చేశారు.
అమెరికా పరిపాలనలో ప్రత్యేక ప్రభుత్వ ఉద్యోగిగా తన పదవీకాలం ముగిసిందని ఎలోన్ మస్క్ తన ప్రకటనలో పేర్కొన్నారు. అనవసరమైన ప్రభుత్వ ఖర్చులను తగ్గించే లక్ష్యంతో ఒక ప్రధాన కార్యక్రమానికి దోహదపడే అవకాశాన్ని ఇచ్చినందుకు అమెరికా అధ్యక్షుడు డొనాల్డ్ ట్రంప్‌కు ఆయన హృదయపూర్వక కృతజ్ఞతలు తెలిపారు.
భవిష్యత్తులో DOGE విభాగం మరింత సమర్థవంతంగా పనిచేస్తుందని, దాని లక్ష్యాలను సాధిస్తుందని మస్క్ ఆశాభావం వ్యక్తం చేశారు. డోనాల్డ్ ట్రంప్ అధ్యక్ష బాధ్యతలు రెండవసారి స్వీకరించిన తర్వాత, ప్రభుత్వ కార్యకలాపాలలో విస్తృత సంస్కరణలను అమలు చేయడం, సమాఖ్య సంస్థలలో వృధా ఖర్చులను అరికట్టడం అనే ముఖ్య లక్ష్యాలతో ప్రభుత్వ సమర్థత విభాగం (DOGE) స్థాపించబడింది.
కొత్తగా ఏర్పడిన ఈ విభాగానికి ఎలోన్ మస్క్ చైర్మన్‌గా నియమితులయ్యారు. మస్క్ నాయకత్వంలో, DOGE ప్రభుత్వ వ్యయ నియంత్రణపై దృష్టి సారించిన అనేక చర్యలను ప్రారంభించింది.
