సినిమాకు మూలం విదేశీ చిత్రాలనేది బహిరంగ రహస్యమే. ప్రపంచంలో సైకో, హత్య, థ్రిల్లర్ సినిమాలకు కేరాఫ్ అడ్రస్ దర్శకుడు హిచ్ కాక్ అనేది చెప్పనవసరంలేదు. ఆ తర్వాత పలు సినిమాలు రకరకాల ఫార్మెట్ లో వచ్చాయి. ఇలా భయపెట్టే సినిమాలు రానురాను ఇతర దేశాల్లోనూ ఆయా భాషల్లో వచ్చాయి. ఇప్పుడు మరలా ఆ తరహా సినిమాలు వస్తున్నాయి. ఇంతకు ముందు లారెన్స్, సుందర్ సి. వంటి వారు సినిమాలు తీశారు. తాజాగా తెలుగులో భయపెట్టే సినిమాలు శబరి, బాక్ మూవీలు రాబోతున్నాయి. అసలు ఇలాంటి సినిమాలకు కేరాఫ్ అడ్రెస్ అయిన హిచ్ కాక్ ను ఓ సారి గుర్తుచేసుకుందాం.
హిచ్ కాక్ 1968లో నిర్మించిన 'సైకో' చిత్రం ప్రపంచ సినిమా చరిత్రలోనే కొన్ని రికార్డులు సృష్టించింది. తనకి అన్నివిధాలా పరిపూర్ణమైన సంతృప్తిని కలిగించిన ప్యూర్ సినిమా 'సైకో' అని చెప్పుకున్నాడు హిచ్ కాక్ . మనదేశంలోని కొన్ని థియేటర్లలో సంవత్సరం పైగా ఆడింది 'సైకో' . అన్ని రోజులు ప్రదర్శించబడిన మొదటి ఇంగ్లీషు సినిమా బహుశ ఇదేనేమో. ఎనిమిది లక్షల డాలర్లతో నిర్మించిన ఈ చిత్రం ప్రపంచ వ్యాప్తంగా వసూళ్ల వర్షం కురిపించాయి.
సినిమా చరిత్రలో అతి భయంకరమైన హత్యగా చెప్పుకునే 'షవర్ బాత్ మర్డర్" ఈ సినిమా లోదే . ఆ రోజుల్లో 'సైకో' సినిమా చూసి వచ్చిన వాళ్ళు స్నానాలగదిలో ఒంటరిగా స్నానం చేయడానికి భయపడేవారు కొన్నాళ్ళపాటు. ప్రేక్షకుల మీద అంతటి ప్రభావాన్ని కలిగించిన ఆ హత్యని చిత్రీకరించడంలో తన దర్శకత్వపు ప్రతిభనంతా వినియోగించాడు హిచ్ కాక్ . కెమెరా, లైటింగ్, సౌండ్, ఎడిటింగ్ ప్లస్ డైరెక్షన్ కలిసి సాధించిన అపూర్వ విజయం షవర్ బాత్ మర్డర్ -సీన్. తెరమీద 40 సెకండ్లు మాత్రమే సాగే ఈ హత్యా దృశ్యాన్ని చిత్రీకరించడానికి వారం రోజులు పట్టింది.
ఊరికి చివరగా వున్న ఒక హోటల్ గదిలో బాత్రూం తలుపులు చేరవేసి నగ్నంగా స్నానం చేస్తుంటుంది హీరోయిన్ . ఉన్నట్టుండి సుడిగాలిలా బాత్రూం తలుపులు తెరుచుకుని లోపలికి ప్రవేశించిన ఒక అస్పష్టమైన ఆకారం ఆ అమ్మాయిని కత్తితో పొడిచి చంపి అదృశ్యమవుతుంది. నిర్జీవమైన ఆ అమ్మాయి నగ్నశరీరం నేలకొరిగి పోవడం, బాత్రూం గోడలమీదా, నేలమీదా చిందిన నెత్తురు నీళ్ళలో కరిగి సింకు దగ్గర సుడులు తిరిగి పైపు లోపలకి జారిపోవడం - మాటలతో వర్ణించ నలవికాని రీతిలో అద్భుతంగా చిత్రించబడింది. తెర మీద 15 సెకండ్ల సేపు మాత్రమే కనిపించే ఈ దృశ్యంలో 70 షాట్స్ ఉన్నాయంటే నమ్మశక్యం కాదు. అంటే 70 సార్లు కెమెరా పొజిషన్ ని మార్చాల్సి వచ్చిందన్న మాట. మరో విశేషం ఏమిటంటే అసలు చిత్రీకరణలో హంతకుడి చేతిలోని కత్తి ఒక్కసారి కూడా హీరోయిన్ శరీరాన్ని తాకకపోవడం.
