స్టాంపుల సేకరణ, చెస్ ఆడటం, క్రికెట్ ఆడటం, పాటలు పాడటం, పెయింటింగ్ చేయడం, డ్రాయింగ్ వేయటం... లాంటి వాటినన్నింటినీ హాబీస్ (అభిరుచులు) అని అంటారు. మనుషుల్లో ఉండే సృజనాత్మకతను పెంపొందించేందుకు ఈ హాబీస్ తోడ్పడుతాయి. ఒక పిల్లవాడు ఏదేని హాబీని పెంచుకుంటే, అది అతడి శారీరక ఎదుగుదలతో పాటు మానసిక ఎదుగుదలకు తోడ్పడుతుందని పలు పరిశోధనల్లో రుజువైంది కూడా...!
పైన చెప్పుకున్నవే కాకుండా... పిల్లలలో ఆసక్తిని పెంపొందించే అంశాలు మరెన్నో ఉన్నాయి. నోటు పుస్తకాలలో ఆకులను, పూలరేకులను అతికించడం కావచ్చు, రాలిపడిన పక్షి ఈకలను దాచటం కావచ్చు... హాబీలకు అదీ, ఇదీ అనే తేడాలేమీ ఉండవు. వాటిని ఎంపిక చేసుకోవడంలోనే తల్లిదండ్రులు సరైన గైడెన్స్ ఇవ్వగలగాలి.
హాబీస్ అంటే టీవీ చూడటం, వీడియో గేమ్స్ ఆడటం అని చాలామంది అనుకుంటుంటారు. అయితే హాబీస్ వేరు, హాబిట్స్ వేరు. హాబీస్ ఒత్తిడి నుంచి సేద తీరుస్తాయి. విషయ సేకరణను పెంచుతాయి. సంతృప్తిని మిగుల్చుతాయి. ఇది ఇలా చేస్తే బాగుండు అనే ఆలోచనలను రేకెత్తిస్తాయి, చదువులో కాస్త వెనుకబడినా నేను సాధించగలననే ఆత్మవిశ్వాసాన్ని పెంచుతాయి.
హాబీ అనేది వృత్తి కాదు, ఓ ప్రవృత్తి మాత్రమే. వృత్తి బ్రతికేందుకు దారి చూపిస్తే... ఆయా వ్యక్తుల్లోని ప్రవృత్తి జీవించటంలోని గొప్పదనాన్ని తెలియజేస్తుంది. సహజంగా పిల్లవాడు పుడుతూనే పదిరకాల కళలను, తెలివితేటలను ఆపాదించుకుని పుడతాడని.. కొన్ని సంవత్సరాల క్రితమే మానసిక శాస్త్రవేత్తలు వెల్లడించారు.
