చిల్లీ పనీర్ ఎలా తయారు చేస్తారు?
, సోమవారం, 8 జులై 2013 (17:31 IST)
చిల్లీ పనీరు ఎలా తయారు చేస్తారు. దాని తయారీకి కావాల్సిన పదార్థాలేంటి అనే అంశాలను ఇక్కడ పరిశీలిద్ధాం. 250 పనీర్, 200 గ్రాముల కాప్సికమ్, 200 గ్రాముల ఉల్లిపాయలు, నాలుగు టమోటాలు, నాలుగు పచ్చిమిర్చి, రెండు టేబుల్ స్పూన్ల అల్లం, వెల్లుల్లి పేస్ట్, రెండు టేబుల్ స్పూన్ల ఉల్లిపాయ పేస్ట్, సోయా సాస్, టొమాటో ప్యూరీ, ఒక టీ స్పూన్ చిల్లీసాస్, అర టీ స్పూన్ మిరియాల పొడి, అర కప్పు నీళ్లు, రెండు కప్పుల నూనె, తగినంత ఉప్పును సిద్ధం చేసి ఉంచుకోవాలి. తయారీ విధానం... తొలుత, ఉల్లిపాయలు, కాప్సికమ్‌లను సన్నగా ముక్కలుగా తరుక్కుని పెట్టుకోవాలి. పనీర్‌ను మనకు ఇష్టమైన సైజుల్లో (మరీ అంత పెద్దవి కాకుండా) కట్ చేసుకోవాలి. పచ్చి మిరపకాయలను చీల్చి పెట్టుకోవాలి. టొమాటోలను చిన్న ముక్కలుగా చేసి పక్కకు పెట్టుకోవాలి. పొయ్యి మీద బాణలి పెట్టి అందులో నూనె పోసి కాప్సికమ్, పనీర్, ఉల్లిపాయ ముక్కలు, టొమాటోలు ఒక దాని తర్వాత చిటికెడు ఉప్పు వేస్తూ వేసి వేయించి ఒక ప్లేట్‌లో తీసి పెట్టుకోవాలి. నూనెను తిరిగి వేడి చేసి, దానిలో ఉల్లిపాయ పేస్ట్ వేసి రెండు నిమిషాలు వేయించాలి. అందులో అల్లం, వెల్లుల్లి పేస్ట్ వేసి దాన్ని కూడా రెండు నిమిషాలు వేగనివ్వాలి. తర్వాత టొమాటో ప్యూరీ వేసి మరో రెండు నిమిషాలు వేయించాలి. ఇప్పుడు అందులో కారం, మిరియాల పొడి వేసి ఒక అర నిమిషం వేగనివ్వాలి. అందులోనే చిల్లీ సాస్, సోయా సాస్ వేసి మరో రెండు నిమిషాలు వేయించాలి. తర్వాత తరిగి పెట్టుకున్న మిరపకాయలు వేసి ఒక నిమిషం తర్వాత కాప్సికమ్, పనీర్, ఉల్లిపాయ ముక్కలు వేసి నీళ్ళు పోసి మూత పెట్టి ఐదు నుంచి నిమిషాలు ఉడికించాలి. తర్వాత మూత తీసి ఒక నిమిషం ఉంచి దించినట్టయితే చిల్లీ పనీర్ సిద్ధమైనట్టే.
