బిగ్ బాస్ తెలుగు 3 సీజన్ మరో రెండు రోజుల్లో ముగిసిపోనుంది. ఈ నేపధ్యంలో బిగ్ బాస్ విన్నర్ ఎవరన్న దానిపై విపరీతమైన ఆసక్తి నెలకొని వుంది. ఐతే ఇప్పుడు టాలీవుడ్ నటి, బిగ్ బాస్ ఇంటి నుంచి ఎలిమినేట్ అయిన హేమ చేసిన తాజా వ్యాఖ్యలు చర్చనీయాంశమయ్యాయి. అది కూడా యాంకర్ శ్రీముఖి పైన హేమ చేసిన ఈ వ్యాఖ్యలు మరో రెండు రోజుల్లో బిగ్ బాస్ విన్నర్ ఎవరనేది తేలే సమయంలో చేయడంతో మరింత ఆసక్తిని కలిగిస్తోంది.
ఇంతకీ హేమ ఏమన్నదంటే... తను బిగ్ బాస్ ఇంట్లో వుంటే వాళ్లందరికీ గట్టి పోటీ ఇస్తానని శ్రీముఖి బ్యాచ్ అంతా కలిసి తనను చాలా తెలివిగా బయటకు పంపేలా చేశారని సంచలన వ్యాఖ్యలు చేశారు. తనను రెచ్చగొట్టి తను రెచ్చిపోయేలా చేసి పంపించేశారనీ, తనను పంపేయాలన్న ప్లాన్ శ్రీముఖి బర్త్ డే రోజునే జరిగిపోయిందని ఆమె అన్నారు.
తను హిమజ ఎలిమినేట్ అయ్యేంతవరకు మాత్రమే బిగ్ బాస్ షో చూశాననీ, ఆ తర్వాత ఆ షోను పట్టించుకోవడం మానేశానంటూ ఆమె చెప్పుకొచ్చారు. మరి హేమ వ్యాఖ్యలతో బిగ్ బాస్ విన్నర్ ఫలితంపైన ఏమైనా ప్రభావం చూపుతుందో చూడాల్సి వుంది.
