Brahmanandam, Savitri Krishna, Kancharla Achyuta Rao, Upendra
ఒక సినిమా తీయడానికే కిందమీద పడుతున్న ఈ రోజుల్లో ఒకేసారి ఐదు సినిమాలు తీస్తుండటం నిజంగా ఓ సంచలనం అని ప్రముఖ హాస్య నటుడు బ్రహ్మానందం అభివర్ణించారు. కంచర్ల ఉపేంద్ర హీరోగా, సావిత్రి కృష్ణ హీరోయిన్ గా, ఆర్యన్ సుభాన్ ఎస్.కె. దర్శకత్వంలో ఎస్. ఎస్.ఎల్.ఎస్. (SSLS) క్రియేషన్స్ పతాకంపై కంచర్ల అచ్యుతరావు నిర్మించిన "ఉపేంద్ర గాడి అడ్డా" చిత్రం ప్రీ రిలీజ్ వేడుక హైదరాబాద్ లోని దశపల్లా హోటల్ లో ఘనంగా జరిగింది.ఈ సందర్భంగా ఇదే బ్యానర్ లో ఇదే హీరోతో తీస్తున్న ఐదు సినిమాల టీజర్లను విడుదల చేశారు.
అలాగే "ఉపేంద్ర గాడి అడ్డా" చిత్రం ట్రైలర్ ను, నరసింహ నంది దర్శకత్వంలో ఈ నిర్మాత తీయబోతున్న ఆరవ చిత్రం "1920 భీమునిపట్నం" పోస్టర్ ను ఈ ప్రీ రిలీజ్ వేడుకకు ముఖ్య అతిథిగా విచ్చేసిన బ్రహ్మానందం విడుదల చేశారు. ఈ సందర్భంగా బ్రహ్మానందం పై విధంగా స్పందించారు.
ఇంకా ఆయన మాట్లాడుతూ, "మా అబ్బాయి కూడా హీరో అనే విషయం తెలిసిందే. ఇలాంటి కొత్త హీరోలను ఆశీర్వదించినపుడు మా అబ్బాయిని కూడా భగవంతుడు ఆశీర్వదిస్తాడన్న ఉద్దేశ్యంతో ఈ ఫంక్షన్ కు వచ్చాను. కుమారుడ్ని హీరోగా పరిచయం చేయడమే కాదు ఒకేసారి ఈ చిత్ర నిర్మాత అచ్యుతరావు ఓక ఫ్యాక్టరీ లాగా ఒకేసారి ఐదు సినిమాలు తీస్తుండటం అభినందనీయం. దీనివల్ల పరిశ్రమను నమ్ముకున్న వారికి అవకాశాలు ఇచ్చి, భోజనం పెట్టినట్లవుతుంది. తన కుమారుడి పట్ల ఆయనకున్న ప్రేమ, నమ్మకానికి ఇది ఓ నిదర్శనం. ఈ ఐదు సినిమాల టీజర్స్ ను చూస్తుంటే వేటికవే విభిన్నమైన కమర్షియల్ సినిమాలుగా అనిపిస్తున్నాయి. ఈ రోజు హీరో కంచర్ల ఉపేంద్ర పుట్టినరోజు ఇంత భారీగా జరుపుకోవడం ఆనందదాయకం. అతనికి ఉజ్జ్వల భవిష్యత్తు కలగాలని కోరుకుంటున్నాను" అని అన్నారు. .
చిత్ర నిర్మాత కంచర్ల అచ్యుతరావు మాట్లాడుతూ , "మంచి కథలను ఎంపిక చేసుకుని, టాలెంట్ ను గుర్తించి మరీ ఎక్కడా కాంప్రమైజ్ కాకుండా ఈ సినిమాలను తీస్తున్నాం. నవంబర్ నుంచి ప్రతీ నెలా ఒక సినిమాను విడుదల చేయబోతున్నాం. ఎన్నో ఏళ్లుగా విశాఖపట్నం లో మా ట్రస్ట్ ద్వారా ఎన్నో సంక్షేమ సేవా కార్యక్రమాలు చేస్తున్నాం. మేము తీస్తున్న సినిమాల ద్వారా వచ్చే లాభాలను కూడా ప్రజా సేవా కార్యక్రమాలకు వెచ్చించదలచుకున్నాం. మా పెద్దబ్బాయి జయంతిని పురస్కరించుకుని సెన్సార్ పూర్తయితే నవంబర్ మొదటివారంలో ఉపేంద్ర గాడి అడ్డా సినిమాను విడుదల చేయాలని అనుకుంటున్నాం..పూర్తి వినోదం, మాస్ అంశాలతో ఈ చిత్రం అలరింపజేస్తుంది" అని అన్నారు.
హీరో కంచర్ల ఉపేంద్ర మాట్లాడుతూ , "నా పుట్టిన రోజు సందర్భంగా నాతో మా నాన్న తీస్తున్న ఐదు సినిమాల టీజర్స్ ను విడుదల చేస్తూ, ఇంత భారీగా ఈ కార్యక్రమం జరుపుతుండటం నాకో వెలకట్టలేని పెద్ద బహుమతి. ఇంతమంది ఆత్మీయులు, శ్రేయోభిలాషుల, పరిశ్రమ వారు అందజేసిన ఆశీస్సులు నాకు వరాలు అవుతాయని' అని అన్నారు.
దర్శకుడు ఆర్యన్ సుభాన్ ఎస్.కె. మాట్లాడుతూ , "సోషల్ మీడియా నేటి సమాజాన్ని ఎంతగా ప్రభావితం చేస్తుందో తెలియంది కాదు. దానివల్ల చెడు మార్గాన్ని ఎంచుకోకుండా, మంచిని పెంపొందింపజేస్తే, సమాజం మరింత వికాసవంతం అవుతుందన్న సందేశాత్మక పాయింట్ ను కూడా ఇందులో ఆవిష్కరించాం. నిర్మాత, హీరో ఇచ్చిన సంపూర్ణ స్వేచ్ఛ, సహకారం వల్లే ఈ సినిమాను ఎంతో వేగంగా పూర్తి చేయగలిగాం" అని అన్నారు.
హీరోయిన్ సావిత్రి కృష్ణ మాట్లాడుతూ, తన కెరీర్ మలుపునకు ఈ సినిమా ఎంతగానో దోహదం చేస్తుందన్న ఆకాంక్షను వ్యక్తం చేశారు.
ఈ వేడుకలో సహ నిర్మాతలు కంచర్ల సుబ్బలక్ష్మి, కంచర్ల సునీత, ఈ బ్యానర్ లో తీస్తున్న మిగతా సినిమాల దర్శకులు, సాంకేతిక నిపుణులు, నటీనటులతో పాటు పరిశ్రమకు చెందిన పలువురు పాల్గొన్నారు.
