వివాదాస్పద చిత్రం "ది కేరళ స్టోరీ" చిత్ర ప్రదర్శనకు అడ్డంకులు ఎదురవుతున్నాయి. ఈ మూ ప్రదర్శనను సోమవారం నుంచి తమిళనాడు వ్యాప్తంగా నిలిపివేయనున్నారు. ముఖ్యంగా, మల్టీప్లెక్స్ థియేటర్లలో చిత్రాన్ని ప్రదర్శించబోమి మల్టీప్లెక్స్ థియేటర్స్ యజమానులు వెల్లడించారు. రాష్ట్రంలో శాంతిభద్రత సమస్య తలెత్తకూడదనే ఈ నిర్ణయం తీసుకున్నట్టు వారు తెలిపారు.
ఈ నెల 5వ తేదీ శుక్రవారం విడుదలైన ఈ చిత్రం విడుదలకు ముందే వివాదాస్పదమైంది. అయినప్పటికీ చిత్రాన్ని యధావిధిగా శుక్రవారం రిలీజ్ చేశారు. అయితే, ఈ చిత్రాన్ని వీక్షించొద్దంటూ తమిళనాడులోని దర్శకుడు సీమాన్ సారథ్యంలోని నామ్ తమిళర్ కట్చి, ఎస్.డి.పి.ఐ వంటి కొన్ని పార్టీలు కూడా పిలుపునివ్వడమే కాకుండా ఆందోళన కార్యక్రమాలు కూడా చేపట్టాయి.
దీనికితోడు ఈ చిత్రాని ప్రేక్షకుల ఆదరణ పెద్దగా లభించలేదు. దీంతో షోలను రీషెడ్యూల్ చేస్తున్నారు. ఇప్పటికే షెడ్యూల్ చేసిన పలు షోలను కూడా రద్దు చేశారు. మరోవైపు, ఈ చిత్ర ప్రదర్శనను కొనసాగిస్తే శాంతి భద్రతల సమస్యలు ఉత్పన్నమవుతాయని, అందుకే చిత్ర ప్రదర్శనను సోమవారం నుంచి నిలిపివేస్తున్నట్టు మల్టీప్లెక్స్ థియేటర్స్ ఓనర్స్ అసోసియేషన్ తెలిపింది.
