స్కూల్‌కు వెళ్లేందుకు తన రెండో కుమార్తె సౌందర్య కుమారుడు, తన మనవడు వేధ్ మొండికేశాడు. దీంతో సూపర్ స్టార్ రజనీకాంత్ స్వయంగా తన మనవడిని స్కూలుకు తీసుకెళ్లి వదిలిపెట్టాడు. మనవడితో కారులో రజనీ స్కూల్‌కు వెళుతున్న ఫోటోను ఆయన కుమార్తె సౌందర్య శుక్రవారం ఇన్‌స్టా ఖాతాలో షేర్ చేయడంతో ఈ విషయం బయటకు పొక్కింది.
'ఈ రోజు నా కుమారుడు స్కూల్‌కు వెళ్ళనని మొండికేయడంతో వాడి సూపర్ హీరో తాత (రజనీ) పాఠశాలకు స్వయంగా తీసుకెళ్లారు. వెండితెర అయినా, నిజజీవితంలో అయినా ఎలాంటి పాత్రనైనా నా తండ్రి అద్భుతంగా పోషిస్తారు' అని ఆమె ట్వీట్ చేశారు.
కాగా, సౌందర్య కుమారుడు వేద్‌ను పాఠశాల తరగతి గదిలోకి తీసుకెళ్ళిన రజనీకాంత్‌ను ఇతర పిల్లలుసంభ్రమాశ్చర్యాలతో చూశారు. ఎపుడూ వెండితెరపై కనిపించే తలైవర్ తమ కళ్లముందు ప్రత్యక్షం కావడంతో వారి ఆనందానికి హద్దే లేకుండాపోయింది.
ఇదిలావుంటే, 'వేట్టయాన్‌’ సినిమా పూర్తి చేసిన రజనీకాంత్ ఇపుడు లోకేష్‌ కనకరాజ్‌ దర్శకత్వంలో 'కూలీ' చిత్రంలో నటిస్తున్నారు. ఈ సినిమా షూటింగ్‌లో గ్యాప్‌ లభించడంతో ప్రస్తుతం ఆయన స్థానిక పోయెస్‌ గార్డెన్‌లో ఉన్న తన నివాసంలోనే విశ్రాంతి తీసుకుంటున్నారు.
