ప్రముఖ టీవీలో ప్రసారమయ్యే రియాల్టీ షో బిగ్ బాస్-4. ఈ నెల ఏడో తేదీ నుంచి ప్రసారం కానుంది. ఈ షోకు ప్రముఖ హీరో అక్కినేని నాగార్జున హోస్ట్‌గా వ్యవహరిస్తున్నారు. అయితే, బిగ్బాస్ సీజన్ 4 కోసం కొందరిని ఎంపికచేశారంటూ పలువురి పేర్లు బయటకు వచ్చాయి. వాటిల్లో సింగర్ సునీత పేరు కూడా ఉంది. బిగ్బాస్ టీమ్ అధికారికంగా ప్రకటించకముందే కొన్ని వెబ్‌సైట్లు అత్యుత్సాహంతో సునీత పేరును ప్రస్తావించాయి.
దీనిపై సింగర్ సునీత స్పందించారు. సునీత తాను అందులో పాల్గొనట్లేనని స్పష్టం చేసింది. 'నా ప్రియమైన మిత్రులారా.. నేను బిగ్బాస్ 4 తెలుగులో లేను.. భవిష్యత్తులోనూ ఉండను. ఫర్ యువర్ ఇన్ఫర్మేషన్' అని ఆమె తన ఫేస్‌బుక్ ఖాతాలో ప్రకటించారు. కాగా, బిగ్బాస్4 షో ప్రోమో వీడియోలను ఇప్పటికే విడుదల చేసి ఈ షోపై మేకర్స్‌ ఆసక్తి రేకెత్తిస్తోన్న విషయం తెలిసిందే.
అలాగే, ఈ షోలో సినీనటి కల్పిక గణేశ్ కూడా పార్టిసిపేట్ చేస్తున్నట్టు వార్తలు వస్తున్నాయి. దీనిపై తాజాగా ఆమె స్పందిస్తూ, ఈ రియాల్టీ షోలో ఇప్పుడే కాదు, ఎప్పటికీ తనను చూడలేరని తెలిపింది. భవిష్యత్తులో కూడా ఈ షోలో తాను పాల్గొనబోనని స్పష్టం చేసింది. దీంతో, ఈ వార్తలకు ఫుల్ స్టాప్ పడినట్టయింది.
