దర్శక ధీరుడు ఎస్ఎస్ రాజమౌళి - జూనియర్ ఎన్టీఆర్, రామ్ చరణ్‌ల కాంబినేషన్‌లో ఆర్ఆర్ఆర్ మూవీ తెరకెక్కుతోంది. ఈ చిత్రం షూటింగ్ శరవేగంగా సాగుతోంది. ఇందులో ఎన్టీఆర్ కొమరం భీమ్ పాత్రలోనూ, చెర్రీ అల్లూరి సీతారామరాజు పాత్రల్లో కనిపించనున్నారు. అయితే, ఒక సందర్భంగా చెర్రీ పోలీస్ ఆఫీసర్‌గా కనిపిస్తారు. అలాగే, ఎన్టీఆర్ కూడా ముస్లిం టోపీ ధరిస్తారు. ఈ టోపీ ధారణపై చరిత్రకారులు తీవ్ర అభ్యంతరం వ్యక్తం చేశారు. విమర్శకులుసైతం నోరెళ్లబెట్టారు.
వీటిపై ఈ చిత్రానికి కథను సమకూర్చిన దర్శకుడు రాజమౌళి తండ్రి విజయేంద్ర ప్రసాద్ క్లారిటీ ఇచ్చారు. కొమరం భీమ్ టోపీ పెట్టుకోవడానికి గల కారణాన్ని వివరించారు. భీమ్‌ను పట్టుకోవడానికి నిజాం ప్రభువులు యత్నించారని, ఆయనను వెంటాడారని విజయేంద్ర ప్రసాద్ తెలిపారు. నిజాం పోలీసుల నుంచి తప్పించుకోవడానికి కొమరం భీమ్ ముస్లిం యువకుడిగా మారాడని, ముస్లిం టోపీ ధరించాడని చెప్పారు.
ఇకపోతే, సీతారామరాజు పాత్రలో నటించిన రామ్ చరణ్‌ను పోలీసు పాత్రలో చూపించడానికి కూడా ఒక కారణం ఉందన్నారు. సిల్వర్ స్క్రీన్‌పై అది ప్రేక్షకులకు అద్భుతమైన అనుభూతిని ఇస్తుందన్నారు. ఎన్టీఆర్, రామ్ చరణ్‌ల ఇమేజ్‌ను దృష్టిలో పెట్టుకునే 'ఆర్ఆర్ఆర్' కథను సిద్ధం చేశామని వెల్లడించారు.
