'కావేరీ'కి 'కాలా'కు సంబంధం ఏంటి.. ఎపుడూ మమ్మల్నే టార్గెట్ చేస్తారా? ప్రకాష్ రాజ్

తమిళ సూపర్ స్టార్ రజినీకాంత్ నటించిన తాజా చిత్రం "కాలా". ఈ చిత్రం ఈనెల ఏడో తేదీన ప్రేక్షకుల ముందుకురానుంది. అయితే, ఈ చిత్రం కావేరీ వివాదంలో చిక్కుకుంది. ఫలితంగా కర్ణాటక రాష్ట్రంలో విడుదలకు నోచుకోలేని

తమిళ సూపర్ స్టార్ రజినీకాంత్ నటించిన తాజా చిత్రం "కాలా". ఈ చిత్రం ఈనెల ఏడో తేదీన ప్రేక్షకుల ముందుకురానుంది. అయితే, ఈ చిత్రం కావేరీ వివాదంలో చిక్కుకుంది. ఫలితంగా కర్ణాటక రాష్ట్రంలో విడుదలకు నోచుకోలేని పరిస్థితి ఏర్పడింది. ఈ కారణంగా చిత్ర నిర్మాతకు రూ.30 కోట్ల మేరకు నష్టం వాటిల్లే అవకాశం ఉంది. దీనిపై సినీ నటుడు ప్రకాష్ రాజ్ స్పందించారు.

కావేరీ వివాదానికి 'కాలా' చిత్రానికి సంబంధమేమిటని ఆయన ప్రశ్నించారు. ఎపుడు చూసినా ఏదో ఒక వివాదంపై ముడిపెట్టి సినిమా వాళ్లనే ఎందుకు టార్గెట్ చేస్తారంటూ ఆయన ప్రశ్నించారు. బీజేపీ ప్ర‌భ‌త్వం 'ప‌ద్మావ‌త్' చిత్రం విషయంలో వ్య‌వ‌హ‌రించిన‌ట్టుగానే.. ఇక్క‌డి కర్ణాటక ప్ర‌భుత్వం 'కాలా'తో వ్య‌వ‌హ‌రిస్తోందని ఆయన మండిపడ్డారు. 

అదేసమయంలో 'కాలా' చిత్రంపై నిషేధం విధించాలని డిమాండ్ చేస్తోంది తాము కాద‌ని క‌ర్ణాట‌క ఫిల్మ్ ఛాంబ‌ర్ స‌భ్యులు చెపుతున్నారనీ, ప్ర‌జ‌ల నుంచి వ‌స్తున్న వ్య‌తిరేక‌త వ‌ల్లే ఈ చిత్రాన్ని విడుద‌ల చేయ‌క‌పోవ‌డ‌మే మంచిదని డిస్ట్రిబ్యూట‌ర్లు, ఎగ్జిబిట‌ర్లు స్వ‌చ్ఛందంగా నిర్ణ‌యం తీసుకున్నారని చెప్పడం భావ్యంకాదన్నారు. ఏదిఏమైనా 'కాలా' నిషేధానికి కేంద్ర, రాష్ట్ర ప్ర‌భుత్వాలే బాధ్య‌త వ‌హించాల'ని ప్రకాష్‌రాజ్ అభిప్రాయపడ్డారు. 

కాగా, సుప్రీంకోర్టు ఆదేశాల మేరకు కావేరీ జలాల పంపిణీ కోసం నిర్వహణ మండలిని ఏర్పాటు చేయాలని తమిళనాట పెద్ద ఎత్తున ఆందోళనలు జరిగాయి. ఈ సమయంలో రజినీకాంత్ కూడా ఈ ఆందోళనలకు మద్దతు తెలిపారు. దీనిపై కన్నడ ప్రజలు, రైతులు తీవ్ర ఆగ్రహం వ్యక్తంచేశారు. ఈ కారణంగానే ఇపుడు 'కాలా' చిత్రం విడుదలను వారు అడ్డుకునేందుకు చూస్తున్నారు.