బాలీవుడ్ ఫైర్‌బ్రాండ్ కంగనా రనౌత్ తొలిసారి తన పెళ్లిపై స్పందించారు. త్వరలోనే శుభవార్త చెబుతానని వెల్లడించారు. ఓ ఇంట‌ర్వ్యూలో ఆమె మాట్లాడుతూ, రాబోయే ఐదేళ్ల‌లో ఎలా క‌నిపించ‌బోతున్నారు అని ప్ర‌శ్న‌లు సంధించగా, దానికి ఆస‌క్తిక‌ర స‌మాధానాలు ఇచ్చారు.
రాబోయే ఐదేళ్ల‌లో త‌ల్లిగా న‌న్ను నేను చూడాల‌ని అనుకుంటున్నాను. త్వరలోనే పెళ్లి చేసుకొని పిల్ల‌ల్ని కనాల‌ని ఉంది. అని కంగనా రనౌత్ బ‌దులిచ్చింది. మీ జీవితంలో ఎవరైనా ప్ర‌త్యేక‌మైన వ్య‌క్తి ఉన్నారా? అంటే అవున‌ని ఆమె తెలిపారు.
అంతేకాదు.. ఆ వ్య‌క్తి గురించి త్వరలోనే అంద‌రికీ తెలుస్తుంద‌ని కంగనా చెప్ప‌డం విశేషం. రీసెంట్‌గానే కేంద్ర ప్ర‌భుత్వం ద్వారా ప‌ద్మ‌శ్రీ అవార్డును స్వీక‌రించిన విష‌యం తెలిసిందే. కంగనా తన ప‌దిహేను ఏళ్ల కెరీర్‌ ఆణిముత్యాల్లాంటి చిత్రాల‌తో ప్రేక్ష‌కుల‌ని అల‌రించింది.
ఉక్కు మ‌హిళ అయిన ఇందిరా గాంధీ జీవితానికి సంబంధించిన విశేషాల‌ను తెలుసుకుని క‌థ‌ను రూపొందించే ప‌నిలో కంగన అండ్ టీమ్ వ‌ర్క్ చేస్తుంది. కాగా, రీసెంట్‌గా కంగనా రనౌత్.. తమిళనాడు మాజీ ముఖ్యమంత్రి దివంగత జయలలిత జీవిత చరిత్ర నేపథ్యంలో "త‌లైవి" చిత్రంతో ప‌ల‌క‌రించారు.
