తమిళ, తెలుగు చిత్ర పరిశ్రమలో గుర్తింపు పొందిన హీరో శరత్ కుమార్. ఈయన కుమార్తె వరలక్ష్మీ శరత్ కుమార్. ఈమె కోలీవుడ్ సినీ ఇండస్ట్రీలో హీరోయిన్‌గా నటిస్తోంది. ఈమె తాజాగా సంచలన వ్యాఖ్యలు చేశారు. తమిళ సినీ ఇండస్ట్రీలో కూడా కాస్టింగ్ కౌచ్ ఉందనీ చెప్పుకొచ్చింది. ఓ పెద్ద హీరో కుమార్తెను అయినప్పటకీ.. తనను కూడా వాడుకోవాలని ప్రయత్నించారంటూ సంచలన వ్యాఖ్యలు చేశారు.
ఇదే అంశాన్ని ఆమె తాజాగా ఇచ్చిన ఓ ఇంటర్వ్యూలో వెల్లడించారు. 'ఒక స్టార్ వారసురాలిని అయినప్పటికీ అన్ని ఇబ్బందులు ఎదుర్కొన్నా.. కానీ సినిమాల కోసం నా క్యారెక్టర్‌ను నేను వదులుకోకూడదు అని గట్టిగా నిర్ణయించుకున్నా. అలాగే ఎదుగుతూ వచ్చా' అని వెల్లడించారు.
తాను ఒక హీరో, రాజకీయ నాయకుడి కుమార్తెను అని తెలిసి కూడా కొంతమంది దర్శకులు, నిర్మాతలు చాలా అసభ్యకరంగా మాట్లాడేవారని ఆమె చెప్పుకొచ్చింది. నేను కాస్టింగ్ కౌచ్‌కు లొంగనని పలువురు ప్రముఖులు చెప్పిన ఆడియో ప్రూఫ్‌లు కూడా తన వద్ద ఉన్నాయని ప్రకటించింది.
'అంతేకాదు మొదట్లో కాస్టింగ్ కౌచ్‌కు నేను నో చెప్పినందుకు చాలా మంది నాపై నిషేదం విధించారు. వాటన్నింటిని దాటుకొని నా స్వశక్తితో 25 సినిమాలను పూర్తి చేశా. 25 మంది మంచి నిర్మాతలు, దర్శకులతో నేను పనిచేశా. ఇటీవలే 29వ సినిమాకు సంతకం చేశా' అని వివరించింది.
మహిళలు ఇప్పటికీ ప్రతి చోట ఎన్నో ఇబ్బందులను ఎదుర్కొంటున్నారని.. వాటిపై వారు ఖచ్చితంగా నోరు విప్పాలని ఆమె సూచించారు. కాగా మాస్‌రాజా రవితేజ నటిస్తోన్న "క్రాక్" చిత్రంలో వరలక్ష్మీ శరత్‌కుమార్ ఓ కీలక పాత్రను పోషిస్తున్న విషయం తెల్సిందే.
టాలీవుడ్ ఇండస్ట్రీలో కాస్టింగ్ కౌచ్ అంశాన్ని హీరోయిన్ శ్రీరెడ్డి బహిర్గతం చేసిన విషయం తెల్సిందే. ఈమె పలువురు హీరోలపై ముఖ్యంగా, మెగా ఫ్యామిలీని టార్గెట్ చేస్తూ విమర్శలు గుప్పించారు. దీంతో ఆమెకు బెదిరింపులు రావడంతో తన మకాంను హైదరాబాద్ నుంచి చెన్నైకు మార్చుకున్నారు.
