మెగా బ్రదర్ నాగబాబు ముద్దుల కుమార్తె నిహారిక. టాలీవుడ్ హీరోయిన్. ఈ అమ్మడు త్వరలోనే ఓ ఇంటికి కోడలు కాబోతోంది. తనకు కాబోయే వరుడిని కూడా ఎంపిక చేసుకుంది. అతనితో కలిసి దిగిన ఫోటోలను ఆమె తాగా బహిర్గతం చేసింది. ఆ ఫోటోలు సోషల్ మీడియాలో వైరల్ అయ్యాయి. నిహారిక పెళ్లాడనున్న వరుడు పేరు చైతన్య జొన్నలగడ్డ. హైదరాబాద్ నగరంలో ఓ సాఫ్ట్‌వేర్ ఇంజనీర్. పైపెచ్చు.. ఓ ఐపీఎస్ అధికారి కుమారుడు. అతని గుణగణాలు నచ్చడంతో నిహారికి పెళ్లికి గ్రీన్ సిగ్నల్ ఇచ్చేసింది.
అయితే, చైతన్య - నిహారికల పెళ్లి ఫిక్స్ కావడానికి ప్రధాన కారణం మెగాస్టార్ చిరంజీవి అని టాలీవుడ్ వర్గాల సమాచారం. ఎందుకంటే.. చైతన్య తండ్రి ఓ ఐపీఎస్ అధికారి. పేరు ప్రభాకర్ రావు. ఈయన - చిరంజీవి మంచి స్నేహితులు. వీరిద్దరూ అపుడపుడూ సమావేశమవుతూ, వివిధ అంశాలపై చర్చించుకుంటుంటారు.
ఈ క్రమంలో ఓ రోజున ప్రభాకర్ తన కుమారుడు చైతన్యకు వధువు కోసం గాలిస్తున్నట్టు చిరంజీవి దృష్టికి తీసుకొచ్చారు. దీంతో చిరంజీవి తన తమ్ముడు నాగబాబుతో సంప్రదించి, నిహారిక ప్రస్తావనను ప్రభాకర్ రావు వద్ద తెచ్చారు. ఆయన తన కుమారుడు చైతన్యతో మాట్లాడారు. ఆ తర్వాత నిహారిక, చైతన్యల మధ్య స్నేహం కుదిరింది.
వీరిద్దరూ కొంతకాలం మాట్లాడుకున్న తర్వాత ఒకరినొకరు ఇష్టపడ్డారు. ఈ విషయాన్ని తన తండ్రి నాగబాబుకు నిహారిక చెప్పడంతో ఆయన పెళ్లికి గ్రీన్ సిగ్నల్ ఇచ్చారు. ఆ తర్వాత తనకు కాబోయే భర్తతో దిగిన ఫోటోలను నిహారికతో పాటు, వరుడు చైతన్య కూడా తమ ట్విట్టర్ ఖాతాలో వెల్లడించారు. అలా, నిహారికకు పెళ్లి ఫిక్స్ కావడంలో చిరంజీవి కీలక పాత్రను పోషించారు.
