దర్శకధీరుడు ఎస్ఎస్.రాజమౌళి నిర్మిస్తున్న మల్టీస్టారర్ చిత్రం 'ఆర్ఆర్ఆర్' - (రౌద్రం - రణం - రుధిరం). ఇందులో రామ్ చరణ్, జూనియర్ ఎన్టీఆర్‌లు హీరోలుగా నటిస్తున్నారు. అయితే, రామ్ చరణ్ సరసన అలియా భట్‌ను జూనియర్ ఎన్టీఆర్ సరసన బ్రిటిషన్ మోడల్ ఒవియా మోరిస్‌ను హీరోయిన్లుగా ఎంపిక చేశారు.
ఆ తర్వాత ఈ చిత్రం షూటింగ్ శరవేగంగా సాగుతున్న నేపథ్యంలో కరోనా లాక్డౌన్ కారణంగా సినిమా షూటింగ్ నిలిచిపోగా, పరిస్థితి ఓ కొలిక్కి రాగానే షూటింగ్‌ను తిరిగి ప్రారంభించాలని రాజమౌళి భావిస్తున్నారు. ఈ నేపథ్యంలో ఆయనకు ఫోన్ చేసిన ఆలియా, పలు విషయాలను చర్చించినట్టు తెలుస్తోంది.
కాగా, ఈ సినిమాకు ఆలియా భట్ కేటాయించిన డేట్స్ అయిపోగా, ఈ విషయాన్ని చెప్పేందుకే ఆలియా ఫోన్ చేసినట్టు తెలుస్తోంది. తాను ఏమీ చెప్పలేని స్థితిలో ఉన్నానని రాజమౌళి వ్యాఖ్యానించగా, ఆమె తన తర్వాతి ప్రాజెక్టులోకి వెళతానని, అందుకు అంగీకరించాలని కోరినట్టు వార్తలు వచ్చాయి.
ఇక ఈ చిత్రం షూటింగులో ఆలియాకు చెందిన భాగాన్ని ఇప్పటివరకూ ఇంకా ప్రారంభించలేదు. మిగిలిన షూటింగులో ఆలియావే ఎక్కువ సీన్స్ ఉన్నాయి. ఈ నేపథ్యంలో తిరిగి ఆమెనే ఒప్పించి తెస్తారా? లేదా ఎన్టీఆర్‌కు హీరోయిన్‌ను మార్చినట్టే రామ్ చరణ్‌కు కూడా మారుస్తారా? అన్నది వేచి చూడాలి.
