తెలంగాణ రాష్ట్రంలోని ఆదిలాబాద్ జిల్లాలోని ఉట్నూరులో ఉన్న ఓ మద్యం డిపోలో బుధవారం భారీ అగ్ని ప్రమాదం చోటుచేసుకుంది. ఉట్నూరు క్రాస్‌రోడ్డులోని ఐఎంఎల్‌డీ మద్యం డిపోలో ఒక్కసారిగా మంటలు చెలరేగాయి. అవి క్రమంగా డిపో మొత్తానికి విస్తరించాయి. దీంతో అందులో ఉన్న లక్షలాది విలువ చేసే మద్యం బాటిళ్లు అగ్నికి ఆహుతయ్యాయి.
ఈ ప్రమాదంపై సమాచారం అందుకున్న అగ్నిమాపక సిబ్బంది ఘటనా స్థలానికి చేరుకుని మంటలను అదుపుచేస్తున్నారు. అగ్నిప్రమాదానికి షార్ట్ సర్క్యూట్ కారణమని అధికారులు తెలిపారు. కోట్లలో ఆస్తినష్టం జరిగినట్లు అంచనావేస్తున్నారు. పోలీసులు కేసు నమోదు చేసుకుని దర్యాప్తు చేస్తున్నారు.
