ఇంగ్లాండ్‌లో జరిగే రెండో ఐసీసీ ట్వంటీ- 20 ప్రపంచకప్ టైటిల్‌ను కూడా దక్కించుకుంటామని టీం ఇండియా మిడిల్ ఆర్డర్ బ్యాట్స్‌మెన్ యువరాజ్ సింగ్ ధీమా వ్యక్తం చేశాడు. 2007లో దక్షిణాఫ్రికా ఆతిథ్యం ఇచ్చిన ప్రారంభ ఐసీసీ ట్వంటీ- 20 ప్రపంచకప్ టైటిల్‌ను టీం ఇండియా కైవసం చేసుకున్న సంగతి తెలిసిందే. డిఫెండింగ్ ఛాంపియన్ ఈసారి కూడా టైటిల్ చేజిక్కించుకుంటుందని యువరాజ్ నమ్మకం వ్యకం చేశాడు.
టీం ఇండియా బ్యాటింగ్, బౌలింగ్ పటిష్టంగా ఉందన్నాడు. ట్వంటీ-20 క్రికెట్‌లో ఏం జరుగుతుందో ముందే ఊహించడం చాలా కష్టం. ముందు ఏం జరుగుతుందో ఎవరికీ తెలియదు. ఈసారి కప్‌ను కైవసం చేసుకుంటామనే ఆత్మవిశ్వాసమైతే ఉందని యూవీ వ్యాఖ్యానించాడు. జట్టు పటిష్టంగా ఉండటంతోపాటు, ఇటీవల ముగిసిన ఐపీఎల్ రెండో సీజన్‌లో తమ జట్టులోని ఆటగాళ్లందరూ ఆడి ఉండటం టీం ఇండియాకు కలిసొచ్చే అంశమని యువరాజ్ సింగ్ చెప్పాడు.
