కావలసిన వస్తువులు:
మైదా : పావు కిలో
పంచదార : అర కిలో
నూనె : పావు కిలో
ఇలా చెయ్యాలి :
వాసన లేని మైదా పిండి తీసుకొని జల్లెడపట్టి కొద్దిగా నెయ్యి వేసి పూరీల పిండిలా తడిపి ఒక గంటసేపు నానబెట్టాలి. దీనితో పాటు అరకిలో పంచదారను లేతపాకంపట్టి ఉంచుకోవాలి. మైదా పిండి అంతటినీ నిమ్మకాయంత ఉండలుగా చేసుకొని, చపాతి సైజులో వత్తుకోవాలి. నాలుగేసి మైదా చపాతీలను ఒక దాని మీద ఒకటి వేస్తూ వాటి మధ్యన కొద్దిగా నెయ్యి రాస్తూ చాపచుట్టలా చుట్టండి. తర్వాత ఆ చుట్టలను చాకుతో ఒక అంగుళము వెడల్పున ముక్కలుగా కోసుకోండి.
ఇదంతా పూర్తయ్యాక ఈ ముక్కలను మరిగే నూనెలో వేసి, గోధుమరంగు వచ్చేవరకూ వేయించాలి. ఆ తర్వాత దించి ఉన్న పాకంలో వేసి కొద్దిసేపు ఉండనిచ్చి తీసేయాలి. మిగిలిన ముక్కలన్నిటినీ ఇలాగే చేయాలి. కాజాలు అన్నిటినీ పాకంలో ముంచి తీసిన తరువాత కొద్దిగా పాకం ఉంటుంది. అప్పుడు మళ్ళీ కాజాలను కొంచెం కొంచెం చొప్పున పాకంలో వేసి, డబ్బాలో పెట్టాలి.
కాజాలను మరోలా కూడా మడుచుకోవచ్చును. మైదా చపాతీ (నాలుగేసి చొప్పున కలపక ముందే) ఒక్కో దానినీ అర అంగుళము వెడల్పున ముక్కలుగా కోయండి. ఇలాంటి నాలుగేసి ముక్కలను కలిపి, మూడు అంగుళాల పొడవు పెట్టి కొసలను నొక్కి వేయిస్తే పువ్వు ఆకారంలో ఉంటుంది.
