బ్యాడ్మింటన్ క్రీడాకారిణి పీవీ సింధుకు విశాఖపట్నంలో కేటాయించిన భూమిపై వివాదం నెలకొంది. విశాఖపట్నం జిల్లా తోటగూరు ప్రాంతంలో గత ప్రభుత్వం పీవీ సింధు బ్యాడ్మింటన్ అకాడమీ, స్పోర్ట్స్ స్కూల్ కోసం భూమిని కేటాయించింది.
అయితే, స్థానిక నివాసితులు ఈ స్థలం గురించి ఆందోళన వ్యక్తం చేస్తున్నారు. ఈ స్థలాన్ని స్పోర్ట్స్ అకాడమీకి కాకుండా జూనియర్‌ కళాశాలకు వినియోగించాలంటూ స్థానికులు ఆందోళనకు దిగారు.
కళాశాలకు స్థలం కేటాయించాలని ప్రభుత్వానికి పదే పదే విన్నవించగా, తమ డిమాండ్‌పై గట్టిగా నిలదీశారు. ఈ పరిస్థితిపై ప్రస్తుతం అధికారంలో ఉన్న సంకీర్ణ ప్రభుత్వం, పీవీ సింధు ఎలా స్పందిస్తారు అనేది ఆసక్తికరంగా మారింది.
జూన్ 2021లో, జగన్ ప్రభుత్వం బ్యాడ్మింటన్ అకాడమీ- స్పోర్ట్స్ స్కూల్ నిర్మాణం కోసం పీవీ సింధుకు విశాఖపట్నంలో రెండు ఎకరాల భూమిని కేటాయిస్తూ నిర్ణయం తీసుకుంది.
చినగదిలి మండలం విశాఖ రూరల్‌లో సర్వేలో ఉన్న పశుసంవర్ధక శాఖకు చెందిన మూడెకరాల నుంచి రెండెకరాలు క్రీడా, యువజన వ్యవహారాల శాఖకు, ఒక ఎకరం ఆరోగ్యశాఖకు బదలాయిస్తూ రెవెన్యూశాఖ ముఖ్య కార్యదర్శి ఉత్తర్వులు జారీ చేశారు.
