నాలుగేళ్ల క్రితం నాకు పరిచయమైన అతడికి నేను చాలా దగ్గరయ్యాను. చాలా సన్నిహితంగా ఉంటూ ఉంటాం. ప్రస్తుతం నేను ఉద్యోగం చేస్తున్నాను. అతడు కూడా ఐటీలో జాబ్ చేస్తున్నాడు. గత రెండేళ్లుగా అతడి మనస్తత్వంలో తేడా కనబడుతోంది. నేను నా సహచర పురుష ఉద్యోగులతో మాట్లాడుతూ కనిపిస్తే చాలు... నాపై మండిపడుతున్నాడు. అలాగే నేను ఎలాంటి దుస్తులు వేసుకోవాలో లిస్టు చెప్పినట్లు చెపుతున్నాడు.
నాకిష్టమైన దుస్తులను వేసుకుంటే దుర్భాషలాడుతున్నాడు. ఇక నా క్లోజ్ ఫ్రెండ్స్ తో మాట్లాడాలంటే అతడి పర్మిషన్ తీసుకోవాల్సిందే. మొత్తంగా చూస్తే నాపై అతడి డామినేషన్ జరుగుతోంది. నా అలవాట్లు, దుస్తుల అలంకరణ మొత్తం అతడు ఎలా చెబితే అలా మారిపోతుంది. ఇతడిని పెళ్లి చేసుకుంటే నా భవిష్యత్తు ఎలా ఉంటుంది...?
ప్రేమికుల్లో ఒకరిపట్ల ఒకరికి మక్కువ ఉంటుంది. తమ ప్రియుడు, ప్రేయసి మరొకరితో మాట్లాడుతుంటే(ఎక్కువసేపు, గంటలకొద్దీ) కాస్త ఉడుక్కోవడమూ ఉంటుంది. తనను ఎక్కడ అశ్రద్ధ చేస్తుందోనన్న భయం ఉంటుంది. అందువల్ల నిత్యం వారు తమ ఆలోచనలను నిత్యం ప్రేయసి చుట్టూ తిరుగుతుంటాయి. ఐతే శ్రద్ధ, ఇష్టం చూపించడం వేరు... డిక్టేట్ చేయడం వేరు. తన కనుసన్నల్లోనే అన్నీ ఉండాలనుకోవడం నియంత తత్వం. అది ఎవరికీ మంచిది కాదు.
ఇకపోతే ప్రేమిస్తున్న వ్యక్తిపై నమ్మకం లేనపుడు అతడు ప్రేమికుడు అనిపించుకోడు. ఇద్దరు వ్యక్తుల మధ్య ప్రేమాభిమానాలు పెంపొందాలంటే ఉండాల్సింది ప్రేమాప్యాయతలు, నమ్మకం తప్ప అనుమానాలు, అపార్థాలు కాదు. కనుక అతడి కండిషన్లకు మీరు ఎలాంటి ఇబ్బందిపడుతున్నారో అతడికి విడమర్చి చెప్పండి. అలాగే మీరు కూడా అతడికి కండిషన్లు పెడితే అతడు పరిస్థితి ఎలా ఉంటుందో ఒకసారి చెక్ చేసుకోని చూసుకోమనండి.
