ఇటీవలికాలంలో ఆస్ట్రేలియాలో భారతీయ విద్యార్థులపై జరుగుతున్న జాత్యహంకార దాడులవల్ల అక్కడి యూనివర్సిటీలన్నీ భారీ స్థాయిలో ఆదాయం కోల్పోయి ఆర్థికంగా దెబ్బతింటున్నాయి. దాడులతో భీతిల్లిన విద్యార్థులు ఆందోళనకు గురై వర్సిటీలను వదిలి స్వదేశాలకు వెళ్లిపోతుండటమే దీనికి కారణంగా చెప్పవచ్చు.
ఈ విషయమై మోనాష్ యూనివర్సిటీ వైస్ ఛాన్స్‌లర్ రిఛర్డ్ లార్కిన్స్ మాట్లాడుతూ... దాడుల వల్ల విద్యార్థులు స్వదేశాలకు తరలిపోవడంతో, వారి నుంచి వచ్చే ఆదాయం గణనీయంగా తగ్గిపోతోందని వాపోయారు. దీంతో వర్సిటీలన్నీ ఆర్థికంగా దెబ్బతిని దుర్భల స్థితిలో కొట్టుమిట్టాడుతున్నాయని ఆయన పేర్కొన్నారు.
ఈ రకంగా విదేశీ విద్యార్థుల నుంచి వచ్చే సుమారు 15 మిలియన్ డాలర్లను వర్సిటీలు కోల్పోయాయని లార్కిన్స్ వివరించారు. ఈ పరిస్థితి నుంచి గట్టెక్కాలంటే... విద్యార్థులకు క్యాంపస్‌లలోనూ, వ్యక్తిగతంగానూ పుర్తి భద్రతను కల్పించాల్సి ఉంటుందని ఆయన అభిప్రాయపడ్డారు.
ఇదిలా ఉంటే... విదేశీ విద్యార్థులు మృతి చెందడం వెనుకగల కారణాలను వెల్లడి చేయాలంటూ "ఆస్ట్రేలియన్ ఫెడరేషన్ ఆఫ్ ఇంటర్నేషనల్ స్టూడెంట్స్" విభాగం ఆ దేశంలోని విశ్వవిద్యాలయాలు, కళాశాలలను డిమాండ్ చేసింది. గడచిన 12 నెలల కాలంలో నమోదైన 51 విదేశీ విద్యార్థుల మరణాలలో 34 కేసులకు సంబంధించిన కారణాలు తెలియటం లేదని, ప్రభుత్వం చెప్పడాన్ని సంఘం ఈ సందర్భంగా తప్పుబట్టింది.
అవి హత్యలో, ఆత్మహత్యలో తెలియజేయాల్సిన బాధ్యత ఆయా విద్యా సంస్థలపై ఉందని పై సంఘం ప్రతినిధి వెసా చావూ వ్యాఖ్యానించారు. ఈ ఘటనలను తీవ్రంగా పరిగణిస్తున్నందున వీటికిగల పూర్తి కారణాలు తెలియాల్సిందేనని, ఆ బాధ్యత విశ్వవిద్యాలయాలు కూడా గుర్తించాలని వెసా కోరారు.
