ట్రిపుల్ తలాక్‌పై నిషేధం విధించినా.. భార్యను తెగతెంపులు చేసేందుకు ట్రిపుల్ తలాక్‌ను వాడేవారి సంఖ్య తగట్లేదు. తాజాగా భార్యతో గొడవ పడిన ఓ ఎన్నారై డాక్టర్.. ఆమెను ఎయిర్‌పోర్టులో వదిలి అమెరికాకు పారిపోయాడు. అక్కడితో ఆగకుండా వాట్సాప్‌లో మూడుసార్లు తలాక్ అంటూ పంపాడు. దీంతో బాధితురాలు పోలీసులను ఆశ్రయించింది. ఈ ఘటన కర్ణాటకలోని బెంగళూరులో చోటుచేసుకుంది.
వివరాల్లోకి వెళితే.. బెంగళూరుకు చెందిన రేష్మా అజీజ్‌కు 2003లో అదే ప్రాంతానికి చెందిన డాక్టర్ జావేద్ ఖాన్‌తో వివాహం జరిగింది. ఈ జంట అమెరికాకు వలస వెళ్లింది. ఈ జంటకు ప్రస్తుతం 13ఏళ్ల కుమార్తె, పదేళ్ల కుమారుడు వున్నారు. కానీ ఈ దంపతుల మధ్య పదే పదే గొడవలు జరిగేవి. దీంతో పెద్దల సమక్షంలో పరిష్కరించేందుకు ఇల్లినాయిస్ నుంచి బెంగళూరు వచ్చినా ఫలితం లేకపోయింది.
ముందు జాగ్రత్తగా ఆమె పాస్ పోర్టు, వీసాలను తీసుకున్న జావేద్.. బెంగళూరులోనే ఆమెను దించేసి రిటర్న్ ఫ్లైట్ ఎక్కి అమెరికాకు చెక్కేశాడు. మూడుసార్లు వాట్సాప్‌లో తలాక్ చెప్పేశాడు. దీంతో షాకైన రేష్మా పోలీసులను ఆశ్రయించింది. ఈ ఘటనపై కేసు నమోదు చేసుకున్న పోలీసులు దర్యాప్తు జరుపుతున్నారు.
మరోవైపు కోర్టులో ట్రిపుల్ తలాక్ చెప్పిన భర్తను భార్య చెంప ఛెల్లుమనిపించింది. తనను కాదన్న భర్తను చెంప వాయించింది. ఈ ఘటన బీహార్‌లో చోటుచేసుకుంది. ట్రిపుల్ తలాక్‌తో భార్యను తెగతెంపులు చేసుకునే వారిపై కఠిన చర్యలు తీసుకోవాలని మహిళలు డిమాండ్ చేస్తున్నారు.
