సీఎం పన్నీర్ సెల్వం కాన్వాయ్‌కి దారిచ్చిన స్టాలిన్.. సోషల్ మీడియాలో ప్రశంసలు..
తమిళనాట రాజకీయాల్లో మార్పు చోటుచేసుకుంది. అమ్మ మరణం తర్వాత అన్నాడీఎంకే- డీఎంకే పార్టీల మధ్య హుందా రాజకీయాలు జరుగుతున్నాయి. తాజాగా శాసనసభకు వెళుతున్న ప్రతిపక్షనేత స్టాలిన్ తన కారు వెనుక సీఎం కాన్వాయ్‌
తమిళనాట రాజకీయాల్లో మార్పు చోటుచేసుకుంది. అమ్మ మరణం తర్వాత అన్నాడీఎంకే- డీఎంకే పార్టీల మధ్య హుందా రాజకీయాలు జరుగుతున్నాయి. తాజాగా శాసనసభకు వెళుతున్న ప్రతిపక్షనేత స్టాలిన్ తన కారు వెనుక సీఎం కాన్వాయ్‌ రావటాన్ని గుర్తించి దారి ఇచ్చారు. ఇంతకీ ఏం జరిగిందంటే..? అసెంబ్లీ సమావేశంలో పాల్గొనేందుకు శుక్రవారం ఉదయం తన నివాసం నుంచి కారులో ప్రతిపక్షనేత స్టాలిన్ బయలుదేరారు. ఆయన కారు వెంట సీఆర్‌పీఎఫ్‌ భద్రతా సిబ్బంది, శాసనసభ్యుల వాహనాలు కూడా వస్తున్నాయి.
ఆ సమయంలో ఆళ్వారుపేట దాటిన తర్వాత ముఖ్యమంత్రి ఓ.పన్నీర్‌సెల్వం కాన్వాయ్‌ రావటాన్ని స్టాలిన్ గుర్తించారు. వెంటనే తన వాహనాన్ని రోడ్డు పక్కన నిలపాల్సిందిగా డ్రైవరుకు సూచించారు. అలాగే భద్రతా సిబ్బంది, శాసనసభ్యులకు ఆ విషయాన్ని చేరవేశారు. దీంతో క్షణాల్లో వారి కార్లన్నీ రోడ్డు పక్కకు చేరుకుని నిలిచిపోయాయి. అదే సమయంలో ముఖ్యమంత్రి కాన్వాయ్‌ ఆ రోడ్డుపై వేగంగా దూసుకెళ్లిపోయింది.
ఆ తర్వాత స్టాలిన్, శాసనసభ్యుల కార్లు అక్కడి నుంచి ముందుకు కదిలాయి. ప్రతిపక్షనేతగా క్యాబినెట్‌ మంత్రి హోదాలో ఉన్న స్టాలిన్ ఇలా ముఖ్యమంత్రిని గౌరవిస్తూ ఆయన కాన్వాయ్‌కు దారిచ్చిన వ్యవహారం సామాజిక మాధ్యమాల్లో విస్తరించడంతో పాటు పలువురు మన్ననలు అందుకుంటోంది.
