స్వాతంత్య్ర సమర యోధుడు నేతాజీ సుభాష్‌ చంద్రబోస్‌ను ఎవరూ యుద్ధ నేరస్థుడు అని పేర్కొనలేదని తాజాగా విడుదలచేసిన రహస్య ఫైళ్లు స్పష్టం చేశాయి. ప్రధాని కార్యాలయానికి చెందిన చాలా ఫైళ్లు నేషనల్ ఆర్కైవ్స్ ఆఫ్ ఇండియాలో భద్రంగా ఉన్నాయి. అందులో నేతాజీకి చెందిన ఫైళ్లను దశలవారీగా ప్రభుత్వం బయటపెడుతున్న విషయం తెల్సిందే.
ఇందులోభాగంగా చివరి దఫాలో 25 ఫైళ్లను ప్రభుత్వం శుక్రవారం వెలుగులోకి తెచ్చింది. అందులో నేతాజీని యుద్ధ నేరస్థుడిగా ఏ దేశ ప్రభుత్వం పేర్కొనలేదని ఆ ఫైళ్లు వెల్లడిస్తున్నాయి.
మరోవైపు నేతాజీ యుద్ధ నేరస్థుడా..? అలా అని ఏ దేశం ప్రకటించింది? అన్న వివరాలు తెలుపాలని బెంగళూరుకు చెందిన ఫ్రీలాన్స్ జర్నలిస్టు చూడామణి నాగేంద్ర గతంలో సమాచార హక్కు చట్టం కింద ప్రభుత్వాన్ని కోరగా.. అందుకు నిరాకరించింది.
