3 రోజులే టైమ్.. నోట్ల రద్దును వెనక్కి తీసుకోలేదో అంతే సంగతులు: మమత వార్నింగ్

పెద్ద నోట్ల రద్దు విషయంలో ప్రధాన మంత్రి నరేంద్ర మోడీపై తృణమూల్ చీఫ్, పశ్చిమబెంగాల్ ముఖ్యమంత్రి మమతా బెనర్జీ విమర్శలు గుప్పించారు. మోడీ ప్రజల వ్యతిరేకి అని.. ప్రస్తుతం దేశంలో ఆర్థిక అత్యవసర స్థితి నడుస

పెద్ద నోట్ల రద్దు విషయంలో ప్రధాన మంత్రి నరేంద్ర మోడీపై తృణమూల్ చీఫ్, పశ్చిమబెంగాల్ ముఖ్యమంత్రి మమతా బెనర్జీ విమర్శలు గుప్పించారు. మోడీ ప్రజల వ్యతిరేకి అని.. ప్రస్తుతం దేశంలో ఆర్థిక అత్యవసర స్థితి నడుస్తుందన్నారు. పెద్ద చేపలను రక్షించేందుకే మోడీ పెద్ద నోట్లను రద్దు చేశారని ఆరోపించారు. నోట్ల రద్దుకు వ్యతిరేకంగా గురువారం తృణమూల్ కాంగ్రెస్ పార్టీ ఆధ్వర్యంలో ఢిల్లీలోని అజాద్‌పూర్ మండీలో నిర్వహించిన ర్యాలీలో మమతా బెనర్జీ, ఢిల్లీ సీఎం కేజ్రీవాల్ పాల్గొన్నారు. 

ఈ సందర్భంగా మమత మోడీని ఏకిపారేశారు. బ్యాంకులకు వేల కోట్ల రూపాయలు ఎగవేసిన లిక్కర్ కింగ్ విజయమాల్యా విదేశాలకు పారిపోవడంలో మోడీ సహకారం ఉందని దుయ్యబట్టారు. మూడు రోజుల్లో నోట్ల రద్దు నిర్ణయాన్ని వెనక్కి తీసుకోవాలని మమతా బెనర్జీ డిమాండ్ చేశారు. లేకుంటే తీవ్ర పరిణామాలు ఎదుర్కోవాల్సి వస్తుందని హెచ్చరించారు. అలాగే గాలి కుమార్తె వివాహానికి వేల కోట్ల రూపాయలు ఎలా వచ్చాయని మమతా బెనర్జీ అడిగారు. గాలి కుమార్తె వివాహంపై ఎందుకు దర్యాప్తు చేయలేదని మమత ప్రశ్నించారు.