కోల్‌కతా మెడికో హత్య కేసులో నిందితుడు సంజయ్ రాయ్‌ను సీబీఐ అరెస్టు చేసింది. ఈ నిందితుడి గురించి కొత్త విషయం ఒకటి వెలుగులోకి వచ్చింది. వివాహితుడైన సంజయ్ రాయ్‌కు భార్యకు మధ్య సత్సంబంధాలు లేవని స్వయంగా అత్త దుర్గాదేవి వెల్లడించారు. కొంతకాలం క్రితం అతడు భార్యపై చేయి చేసుకోవడంతో ఆమెకు గర్భస్రావమైనట్లు తెలిపారు. సంజయ్ మంచివాడు కాదని అభిప్రాయపడ్డారు. అతన్ని ఏం చేసినా ఫర్వాలేదని.. ఉరితీసినా సరేనని ఆమె చెప్పుకొచ్చారు. సంజయ్ రాయ్ చేసిన నేరం గురించి మాత్రం తాను మాట్లాడలేనని దుర్గాదేవి అన్నారు. అంతటి నేరానికి పాల్పడే శక్తి అతడికి ఒక్కడికే లేదని మాత్రం అనుమానం వ్యక్తం చేశారు. మరికొంత మంది ఉండి ఉండొచ్చని అభిప్రాయపడ్డారు.
'అతడితో మాకు సత్సంబంధాలు లేవు. నా కూతురితో అతడికి పెళ్లయి రెండేళ్లు అవుతోంది. అతడికి నా కూతురు రెండో భార్య. వివాహమైన తొలి ఆరు నెలలు అంతా సవ్యంగానే సాగింది. గర్భం దాల్చినట్లు నిర్ధారణ కాగానే క్రమంగా గొడవలు ప్రారంభమయ్యాయి. మూడు నెలల గర్భంతో ఉన్నప్పుడు నా కూతురిపై చేయి చేసుకున్నాడు. దీంతో ఆమెకు గర్భస్రావమైంది. కేసు కూడా నమోదు చేశాం. అప్పటి నుంచి నా కూతరు అనారోగ్య సమస్యలతో బాధపడుతోంది. వైద్య ఖర్చులన్నీ నేనే భరిస్తున్నాను' అని సంజయ్ రాయ్ గురించి దుర్గాదేవి మీడియాకు వివరించారు.
