అమ్మ చివరి కోరిక అదే.. అజితే అన్నాడీఎంకే పగ్గాలు చేపడతాడా? పన్నీర్ ఆ పని చేస్తారా?
అన్నాడీఎంకే పార్టీ అధినేత జయలలిత వారసుడిగా అన్నాడీఎంకే పగ్గాలు ఎవరు చేపడతారనే దానిపై సర్వత్రా చర్చ సాగుతోంది. అమ్మ కన్నుమూయడంతో జయలలిత వారసుడిగా సినీ నటుడు అజిత్ తెరపైకి వచ్చే అవకాశం ఉందని ఊహాగానాలు బ
అన్నాడీఎంకే పార్టీ అధినేత జయలలిత వారసుడిగా అన్నాడీఎంకే పగ్గాలు ఎవరు చేపడతారనే దానిపై సర్వత్రా చర్చ సాగుతోంది. అమ్మ కన్నుమూయడంతో జయలలిత వారసుడిగా సినీ నటుడు అజిత్ తెరపైకి వచ్చే అవకాశం ఉందని ఊహాగానాలు బలంగా వినిపిస్తున్నాయి. రాజకీయాల్లో తన వారసుడిని జయలలిత ఎప్పుడో ఎంపిక చేశారని వార్తలు వినిపిస్తున్నాయి. సినీ నటుడు అజిత్ ఆమెను 'అమ్మ' అని పిలుస్తూ ఉంటారు.
పొయెస్‌ గార్డెన్‌కు నేరుగా చేరుకునే అతి కొద్ది మంది వ్యక్తుల్లో అజిత్ కూడా ఒకరు. జయలలిత మరణానంతరం అన్నాడీఎంకే చీలిపోకుండా యధాతథంగా కొనసాగాలని.. బలమైన ప్రత్యర్థిగా ఉన్న డీఎంకేకు గట్టిపోటీ ఇవ్వాలని అజిత్ వంటి వ్యక్తిని వారసుడిగా తెరపైకి రావడమే మంచిదని టాక్ వస్తోంది. అన్నాడీఎంకేకు తిరుగులేని శక్తిగా మారిన అమ్మకు వారసుడిగా అజిత్‌ను ప్రకటించాలని.. అన్నాడీఎంకే పార్టీ వర్గాల్లో వార్తలు వస్తున్నాయి.
డీఎంకేలో కరుణానిధి, ఆయన తనయుడు స్టాలిన్‌ రూపంలో బలమైన నాయకత్వం ఉన్నప్పుడు జయ తర్వాత అంతే బలమైన నాయకత్వం లేకపోతే, తమిళ రాజకీయాల్లో అన్నాడీఎంకే నిలదొక్కుకోవడం కష్టమనే అంచనాలూ వెలువడుతున్నాయి. ఈ నేపథ్యంలో, తమిళనాట ప్రజాకర్షణ కలిగిన అజిత్ అయితేనే పార్టీని కొనసాగించగలరని అంటున్నారు. జయలలిత, రజనీకాంత్ తర్వాత ఆ స్థాయిలో ప్రజాదరణ అజిత్ సొంతమని చెబుతున్నారు.
జయలలిత కూడా ఇదే విషయాన్ని పార్టీ వర్గాలకు స్పష్టం చేశారని, పన్నీరు సెల్వం అజిత్‌కు చేదోడు వాదోడుగా ఉంటారని అభిప్రాయాలు వ్యక్తమవుతున్నాయి. తన మరణానంతరం పన్నీరు సెల్వం ముఖ్యమంత్రిగా ఉండాలని, తదుపరి ఎన్నికలు వచ్చే నాటికి అజిత్‌ను నాయకుడిగా తయారు చేయాలని అమ్మ తన నమ్మినబంటు పన్నీర్ సెల్వంతో చెప్పినట్లు సమాచారం.
