కన్నడ నటి రన్యా రావు బెయిల్ పిటిషన్పై విచారణను కర్ణాటక హైకోర్టు బుధవారం ఏప్రిల్ 17కి వాయిదా వేసింది, ఈ విషయానికి సంబంధించి అభ్యంతరాలు దాఖలు చేయాలని డైరెక్టరేట్ ఆఫ్ రెవెన్యూ ఇంటెలిజెన్స్ (డీఆర్ఐ)ని ఆదేశించింది. రన్యా రావును బెంగళూరు విమానాశ్రయం నుండి బంగారం అక్రమ రవాణా ఆరోపణలపై అరెస్టు చేశారు.
బెంగళూరులోని ప్రత్యేక కోర్టు నటిని ఏప్రిల్ 21 వరకు జ్యుడీషియల్ కస్టడీకి పంపింది. ప్రస్తుతం ఆమె బెంగళూరు శివార్లలో ఉన్న సెంట్రల్ జైలులో ఉంది. ఆర్థిక నేరాల ప్రత్యేక కోర్టు రెండవ నిందితుడు తరుణ్ రాజు, మూడవ నిందితుడు ఆభరణాల వ్యాపారి సాహిల్ సకారియా జైన్‌ల జ్యుడీషియల్ కస్టడీని ఏప్రిల్ 21 వరకు పొడిగించింది.
సీనియర్ పోలీసు అధికారి రామచంద్రరావు సవతి కుమార్తె రన్యా రావును మార్చి 3న 14.2 కిలోగ్రాముల బంగారాన్ని అక్రమంగా రవాణా చేశారనే ఆరోపణలపై అరెస్టు చేశారు. దీని విలువ రూ. 12.56 కోట్లకు పైగా ఉంటుంది.ఈ కేసును ప్రస్తుతం డైరెక్టరేట్ ఆఫ్ రెవెన్యూ ఇంటెలిజెన్స్ (డీఆర్ఐ), ఎన్‌ఫోర్స్‌మెంట్ డైరెక్టరేట్ (ఈడీ), సెంట్రల్ బ్యూరో ఆఫ్ ఇన్వెస్టిగేషన్ (సీబీఐ) దర్యాప్తు చేస్తున్నాయి.
డీజీపీ రామచంద్రరావు పాత్రను పరిశీలించడానికి రాష్ట్ర ప్రభుత్వం సీనియర్ ఐఏఎస్ అధికారి నేతృత్వంలో ఒక ప్రత్యేక బృందాన్ని ఏర్పాటు చేసింది. దీనికి సంబంధించిన నివేదికను ప్రభుత్వానికి సమర్పించినట్లు వర్గాలు తెలిపాయి. రన్యా రావు ప్రమేయం ఉన్న బంగారు స్మగ్లింగ్ కేసుపై డీఆర్ఐ జరిపిన దర్యాప్తులో, ఆ నటి ఈ కేసులో మూడవ నిందితుడు జైన్‌తో కలిసి హవాలా లావాదేవీలకు పాల్పడిందని తేలింది.
బంగారం అక్రమ రవాణా కేసులో జైన్ అరెస్టుకు సంబంధించి ఆర్థిక నేరాల ప్రత్యేక కోర్టుకు సమర్పించిన రిమాండ్ దరఖాస్తులో, ఆ ఆభరణాల వ్యాపారి, రన్యా రావు హవాలా సంబంధంలో పాల్గొన్నారని డీఆర్ఐ ఆరోపించింది. జైన్ సహాయంతో రన్యా రావు 49.6 కిలోల బంగారాన్ని విక్రయించి, రూ.38.4 కోట్ల హవాలా డబ్బును దుబాయ్‌కు బదిలీ చేసినట్లు దర్యాప్తులో తేలింది.
